Google Gemini надмина значаен праг од една милијарда месечно активни корисници, со што стана еден од најбрзо растечките производи во историјата на Google.

Со ова, Gemini станува 14-тиот производ на Google кој достигнал повеќе од една милијарда корисници, приклучувајќи им се на сервисите како Google Search, Gmail, Google Maps и YouTube.

Особено интересен е растот на платформата во текот на оваа година. Во февруари Gemini имал околу 750 милиони месечно активни корисници, а кон крајот на јули бројката достигнала околу 950 милиони. Само неколку недели подоцна, платформата ја надминала границата од една милијарда.

Повеќе од 100 милиони корисници се на iPhone

Иако Google има огромна предност благодарение на Android екосистемот, Gemini бележи сериозен број корисници и на уредите на Apple.

Повеќе од 100 милиони корисници пристапуваат до Gemini преку iOS, што значи дека повеќе од една десеттина од вкупниот број месечно активни корисници се на iPhone и други Apple уреди.

Корисниците на macOS, пак, се меѓу најактивните – според податоците објавени од Google, тие испраќаат приближно двојно повеќе барања до Gemini во споредба со корисниците на други платформи.

Сè повеќе луѓе ја користат AI за секојдневни задачи

Google наведува дека околу 63 отсто од корисниците користат гласовни разговори со Gemini, додека преку платформата секојдневно се создаваат повеќе од 150 милиони слики.

Gemini исто така може автоматски да извршува задачи во повеќе од 40 апликации. Меѓу можностите се наоѓаат активности како повикување превоз, резервација на ресторан и други задачи кои вештачката интелигенција може да ги реализира во име на корисникот.

Gemini и ChatGPT сега се во „трка до милијарда“

Овој успех доаѓа во период кога и OpenAI со ChatGPT достигна бројка од повеќе од една милијарда месечно активни корисници.

Сепак, директната споредба треба да се земе со резерва бидејќи компаниите објавуваат различни метрики – неделни и месечни активни корисници. Според достапните податоци, ChatGPT ја достигнал границата нешто порано, додека Gemini во последните месеци бележи исклучително брз раст.

Брзото ширење на Gemini покажува дека борбата меѓу најголемите компании во светот на вештачката интелигенција станува сè посериозна. По трката за милијарда корисници, следниот предизвик за Google и OpenAI ќе биде како тие корисници да останат активни и како огромната база да се претвори во одржлив бизнис.