Силно невреме ја зафати Словенија, носејќи поројни дождови, силен ветер и град, додека олујниот фронт веќе се движи кон Хрватска. Погодени се повеќе региони, а најсериозни проблеми се пријавени во Велење, каде обилните врнежи предизвикаа локални поплави. Силни налети на ветер се забележани и во Словењ Градец, Жалец и Превалје.
Според податоците на службите за заштита, станува збор за изразен атмосферски фронт кој во текот на вечерта се движи кон исток и југоисток, носејќи нестабилно време и во регионот. Првите знаци на влошување веќе се почувствувани и во Загреб, каде се регистрирани поројни врнежи и засилен ветер.
Државниот хидрометеоролошки завод издаде жолт метеоаларм за делови од земјата, предупредувајќи на нестабилни услови и можни грмежи со веројатност поголема од 60 проценти.
Метеоролозите најавуваат дека иако времето привремено може да се стабилизира во текот на ноќта, нестабилностите нема целосно да исчезнат. Во текот на следните денови се очекуваат нови врнежи, локални невремиња и значителен пад на температурите.
Граѓаните се повикуваат на зголемена внимателност, особено во подрачја каде се можни силни налети на ветер, град и интензивни врнежи.
