Египетскиот претседател Абдел Фатах ел-Сиси во саботата свечено го отвори новото седиште на Стратешката команда на вооружените сили, наречено „Октагон“, во новата административна престолнина, која се наоѓа околу 45 километри источно од Каиро. Комплексот го добил името по распоредот на осум меѓусебно поврзани осумаголни згради и е сместен во централниот дел на новата египетска престолнина.

Според Ел-Сиси, кој воедно е и врховен командант на египетските вооружени сили, новиот центар претставува значаен чекор во унапредувањето на системите за командување, контрола и управување со воените операции.

Министерот за одбрана, Ашраф Салем Захер, изјави дека комплексот ќе биде јадрото на командниот систем на државата, бидејќи во него е преместена Главната команда на вооружените сили со цел воспоставување единствен систем на управување и координација.

Според податоците на Египетската државна информативна служба, „Октагон“ е најголемиот ваков воен комплекс на Блискиот Исток. Тој ќе служи како административен и одбранбен центар, интегрирајќи системи за командување, комуникации и вештачка интелигенција. Египетските медиуми наведуваат дека комплексот се простира на површина од околу 12 хектари.

За време на свеченото отворање, Ел-Сиси му се заблагодари и на американскиот претседател Доналд Трамп, оценувајќи дека неговите дипломатски напори придонеле за постигнување на договорот во Шарм ел Шеик за прекин на војната во Газа, како и за последователниот договор за завршување на конфликтот со Иран.