Германскиот министер за внатрешни работи Александар Добринт најави дека земјата ќе продолжи со граничните контроли во рамки на Европската унија, и покрај растечките критики од судовите и експертите.
Контролите беа воведени како дел од построгата миграциска политика на владата, а според податоците, од неговото стапување на функција до април 2026 година биле вратени околу 1.340 баратели на азил на границите. Во исто време, бројот на барања за азил значително се намалил – од 350.000 во 2023 година на околу 170.000 минатата година.
Сепак, ваквите бројки се оспорени од експертската јавност. Истражувачката за миграции Викторија Ритиг смета дека ваквото толкување е политички корисно, но научно неосновано. Во меѓувреме, Управниот суд во Кобленц пресуди дека дел од граничните контроли, особено на границата со Луксембург, биле незаконски поради недоволно образложение.
И покрај тоа, Александар Добринт инсистира дека мерките ќе останат, барем привремено, додека не се воспостави функционален европски систем за миграција. Дополнителни контроверзии предизвика неговата одлука за депортации во Авганистан преку контакти со Талибан. Германскиот пратеник Марсел Емерих ја оцени оваа политика како опасен преседан.
Од друга страна, премиерката на покраината Сар Анке Релингер предупреди дека долгорочните гранични контроли не се одржливо решение и можат да ѝ наштетат на Европа. Дебатата продолжува, со поделени ставови околу тоа дали безбедноста или слободното движење треба да имаат приоритет во иднината на Европската унија.
