Францускиот управен суд итно ја суспендираше полициската наредба со која беа забранети студентските демонстрации во Париз. Протестот беше организиран од коалиција на студенти, а по судската одлука демонстрациите започнаа пред универзитетската болница „Питје-Салпетриер“, во 13-тиот арондисман на француската престолнина.

По постапката спроведена по итна процедура, судијата соопшти дека полициската наредба е поништена, но не ја образложи причината за одлуката, објави „Франс 24“.

Во меѓувреме, францускиот министер за правда Жералд Дарманен соопшти дека судовите осудиле 217 лица на затворски казни поради учество во немирите од изминатиот викенд. Зборувајќи пред затворот Флери-Мерожи, во предградието на Париз, Дарманен изјави дека од саботата биле приведени 2.700 лица, од кои повеќе од 1.000 веќе биле изведени пред суд.

„Половина од приведените што завршиле во затвор немале криминално досие“, изјави министерот, додавајќи дека повеќето биле мажи на возраст од 18 до 25 години. Судската одлука овозможи одржување на најавените демонстрации и покрај полициската забрана, додека француските власти продолжуваат со постапките против учесниците во претходните немири.