Претседателката на Европската комисија, Урсула фон дер Лајен, оцени дека ситуацијата со мигрантите во шпанската енклава Сеута е „неприфатлива“ и порача дека опасните илегални преминувања на границите мора да престанат.

„Сликите што пристигнуваат од Сеута се неприфатливи“, изјави Фон дер Лајен.

Таа нагласи дека мрежите за криумчарење мигранти мора да бидат разбиени и дека никој не може да влезе во Европската Унија без да ги почитува нејзините правила.

„Не можеме да дозволиме некој да дојде во нашата Унија без да се придржува до нашите правила. Враќањето на мигрантите мора да биде брзо и во согласност со правилата на Европската Унија“, рече претседателката на Европската комисија.

Фон дер Лајен соопшти дека ги ангажирала еврокомесарот за внатрешни работи и миграција Магнус Брунер и еврокомесарката за Медитеранот Дубравка Шуица за координација на европскиот одговор на кризата. Според неа, Магнус Брунер веќе соработува со шпанските власти и е подготвен да ги посети најпогодените подрачја, а Европската Унија ќе обезбеди дополнителна оперативна поддршка, вклучително и преку Фронтекс.

Во меѓувреме, Дубравка Шуица е во постојан контакт со мароканските власти.

„Убедена сум дека нашето блиско партнерство со Мароко ќе придонесе за конкретни резултати“, изјави Фон дер Лајен.

Во изминатите денови десетици илјади луѓе се обидоа по копно и по море да влезат во Сеута од Мароко, што предизвика сериозна мигрантска криза и мобилизација на шпанските безбедносни сили.