Американските разузнавачки служби активно ѝ помагаат на Украина во планирањето на нападите со беспилотни летала врз руски нафтени рафинерии, обезбедувајќи информации што им овозможуваат на украинските сили да ја заобиколат руската противвоздушна одбрана, објави британскиот весник „Фајненшл тајмс“, повикувајќи се на високи украински функционери.

Според весникот, Вашингтон ѝ доставува на украинската страна разузнавачки податоци за најповолните рути на лет на беспилотните летала, со цел да се зголемат шансите тие успешно да стигнат до целите длабоко на руска територија. Во извештајот се наведува дека токму оваа соработка е една од причините поради кои украинските напади врз руската енергетска инфраструктура во последните месеци станале значително поефикасни.

Според изворите на „Фајненшл тајмс“, информациите за оптималните рути им овозможуваат на украинските дронови полесно да ги избегнат системите за противвоздушна одбрана и да погодат стратешки важни цели.

Весникот не објавува дополнителни детали за обемот на разузнавачката соработка, ниту за конкретните операции во кои наводно биле користени овие информации. Засега нема официјална реакција од американските власти на наводите објавени во текстот, ниту коментар од руската страна.