EXIT сруши рекорди и кај Пирамидите: Starlight од старт меѓу врвните светски фестивали

Во годината кога изостана редовното издание на Петроварадинската тврдина, што EXIT го поврзува со притисоците од властите по поддршката за студентските протести, организаторите го лансираа Starlight во Египет. Според нив, првото издание поставило рекорди во посетеноста и го вброило новиот фестивал меѓу водечките светски фестивалски настани.

19/10/2026
12:40
Глобал
Редакција Трн
Следи го Трн на Google

Пирамидите во Гиза станаа сцена за новиот фестивал на EXIT, Starlight, кој на 9 и 10 октомври привлече десетици илјади посетители од 114 земји. Организиран во соработка со египетските промотори P+US, фестивалот ги спои светските имиња на електронската музика со една од најпрепознатливите локации на планетата.

Според организаторите, Starlight е првиот повеќедневен фестивал на електронска музика со повеќе бини кај Пирамидите во Гиза и најголемиот фестивал досега организиран во Египет. Од EXIT наведуваат и дека станува збор за најголемиот настан со електронска музика на оваа локација по концертот на Жан-Мишел Жар на преминот во новиот милениум.

Светски диџеи пред Пирамидите

Програмата ја предводеа Charlotte de Witte, Adriatique, Michael Bibi, Indira Paganotto, Enrico Sangiuliano, Vintage Culture и Pete Tong, заедно со уште шеесетина меѓународни и регионални изведувачи.

Настапија и Fiona Kraft, Floyd Lavine, Cloonee и Deer Jade, како и Lanna, Coeus, Reblok, Divolly & Markward и Tebra од Србија. Дел од програмата беа и настапите во живо на WhoMadeWho и Satori, додека Giolì & Assia настапија на завршниот настан во неделата.

За дизајнот и визуелните ефекти на главната бина, EXIT соработуваше со уметничкиот колектив Sila Sveta, познат по продукции за светски музички имиња и големи меѓународни настани. Светлосните ефекти и оптичките илузии беа осмислени во однос на локацијата, со Пирамидите што се издигнуваа зад изведувачите и публиката.

„Ова е Гиза, не Ибица“

Фестивалскиот викенд за дел од изведувачите продолжи и надвор од бините. Според соопштението, Michael Bibi пристигнал со родителите, а по својот настап на главната бина се придружил на забавата на No Sleep Giza.

Charlotte de Witte останала три дена во Египет со татко ѝ и пријателите, додека Indira Paganotto пристигнала со својот 13-член тим Artcore по затворањето на сезоната на Ибица.

Спојот на музиката, продукцијата и локацијата го одбележа првото издание, а меѓу посетителите се прошири и слоганот „It’s Giza, not Ibiza!“, односно „Ова е Гиза, не Ибица“.

За EXIT, Starlight претставува нов чекор на меѓународната фестивалска сцена. Организаторите оценуваат дека посетеноста и публиката од 114 земји уште со првото издание го поставиле фестивалот меѓу значајните светски дестинации за љубителите на електронската музика.