Нов топлотен бран ја зафати Европа, при што во повеќе земји температурите повторно се приближуваат или ја надминуваат границата од 40 степени. Најтопло е во делови од Шпанија, Италија, Грција и Балканот, каде што метеоролошките служби предупредуваат на висок ризик од пожари и опасност по здравјето.

Македонија не е исклучок. Според прогнозите на Управата за хидрометеоролошки работи (УХМР), следните денови ќе преовладува претежно сончево и многу топло време, со мала до умерена локална облачност. Ќе дува слаб до умерен ветер, претежно од северен правец.

Максималната дневна температура во поголемиот дел од земјата ќе се движи меѓу 32 и 39 степени, а во најтоплите југоисточни делови повторно ќе се доближи до 40 степени.

Во Скопје времето ќе биде сончево и многу топло, со слаб до умерен северен ветер. Дневната температура ќе достигнува 37 до 39 степени, а и ноќите ќе останат тропски, со минимални температури над 20 степени.

Според прогнозите на метеоролозите, засега не се очекува значително заладување. Жешкото време ќе продолжи и во првите денови од следната недела, со температури кои ќе останат над сезонскиот просек.

Поради високите температури, здравствените власти препорачуваат граѓаните да избегнуваат престој на отворено во најтоплиот дел од денот, од 11 до 17 часот, да внесуваат доволно течности, да носат лесна и светла облека и да обрнат особено внимание на децата, постарите лица и хронично болните, кои се најранливи за време на топлотни бранови.