Голем дел од Европа е погоден од еден од најинтензивните топлотни бранови во мај во последните децении, додека метеоролозите предупредуваат дека крајот на месецот може да влезе во историјата како еден од најжешките досега.

Според анализите на Severe Weather Europe, над континентот се формирала силна „топлинска купола“ (Heat Dome), атмосферски феномен кој функционира како „поклопец“ што ја задржува топлата воздушна маса и спречува нејзино разладување.

Температури и до 16 степени над просекот

Во некои региони се очекуваат температури и до 16 степени над вообичаениот просек за овој период од годината. Во делови од Европа веќе се бележат вредности типични за пикот на летото. Екстремните горештини веќе се чувствуваат во западна Европа, а во текот на неделата дополнително ќе се засилуваат во Шпанија, Португалија, Франција и Германија. Во Лондон веќе се измерени рекордни 32,3 степени Целзиусови, што дополнително ја потврдува јачината на топлотниот бран.

Балканот меѓу најизложените региони

Топлотниот бран се шири и кон Балканот, каде температурите ќе продолжат да растат во следните денови. Метеоролошките прогнози укажуваат дека во делови од медитеранскиот и централноевропскиот регион температурите ќе достигнуваат средни и високи 30-ти степени.

Посебно загрижувачки се прогнозите за северниот и централниот дел на Балканот, каде температурите би можеле да надминат 35°C.

Ризик од рекордни жештини

Метеоролозите предупредуваат дека постои можност за рушење на локални температурни рекорди во деновите пред почетокот на метеоролошкото лето. Лекарите и експертите за клима предупредуваат дека ваквите продолжени топлотни бранови значително го зголемуваат ризикот од топлотна исцрпеност и топлотен удар, особено кај постарите лица, децата и хронично болните.