Европа се соочува со една од најсериозните суши во последните години. Нивото на водата во Рајна и Дунав, две од најважните европски реки, е значително намалено, што веќе предизвикува проблеми во речниот транспорт, производството на електрична енергија и земјоделството.

Поради ниските водостои, товарните бродови не можат да пловат со полн капацитет, а во некои делови од реките сообраќајот е значително ограничен. Тоа ги зголемува трошоците за транспорт и го отежнува снабдувањето на индустријата со суровини и гориво.

Рајна е една од најважните трговски артерии во Европа и преку неа се транспортираат јаглен, нафта, хемикалии, жито и други стоки. Намалениот водостој веќе влијае врз германската индустрија, која во голема мера зависи од речниот транспорт.

Нискиот водостој на Дунав, пак, создава проблеми за пловидбата во повеќе земји од Централна и Југоисточна Европа, а се намалува и производството на електрична енергија во дел од хидроцентралите.

Покрај транспортот и енергетиката, сушата сериозно го погодува и земјоделството. Во повеќе европски држави се очекуваат помали приноси на земјоделските култури поради недостигот од врнежи и долгите периоди со екстремно високи температури.

Според Европската опсерваторија за суша, голем дел од Европа и натаму е под предупредување или аларм поради сушните услови, кои во текот на јуни се влошиле во повеќе региони, особено во централна и западна Европа. Причина се продолжените топлотни бранови, недостигот од врнежи и ниските речни водостои.

Експертите предупредуваат дека доколку сушниот период продолжи и во наредните недели, последиците би можеле дополнително да се продлабочат – од поскап транспорт и енергија до нови притисоци врз производството на храна и водоснабдувањето.