Европа деновиве се соочува со екстремни временски појави, од опасни топлотни бранови на западот на континентот до силни невремиња и пожари во други делови од регионот. Додека Франција и Велика Британија бележат рекордно високи температури, Швајцарија беше погодена од разорна бура која однесе човечки живот, а во Грција пожарникарите се борат со огнени стихии на повеќе фронтови.
Франција затвора стотици училишта поради жештините
Поради екстремниот топлотен бран, денеска во Франција ќе бидат затворени 845 основни и средни училишта. Дополнителни околу 1.800 образовни установи ќе работат со скратено работно време, а учениците ќе бидат пуштани дома уште во раните попладневни часови. Францускиот министер за образование Едуар Жефре изјави дека мерките зависат од локалните услови и дека безбедноста на учениците и вработените останува приоритет.
Во меѓувреме, регионот Ил-де-Франс, каде што се наоѓа Париз, одобри итна финансиска помош од еден милион евра за околу 500 испитни центри. Средствата ќе бидат искористени за набавка на вентилатори, распрскувачи на вода и друга опрема за разладување.
Велика Британија под предупредување за температури до 38 степени
Британската метеоролошка служба издаде ново предупредување за екстремни горештини, бидејќи во текот на следната недела температурите би можеле да достигнат до 38 Целзиусови степени. Предупредувањето ќе важи четири дена и ќе опфати голем дел од Англија и Велс. Највисоките температури се очекуваат во Лондон во среда и четврток, кога топлотниот бран ќе го достигне својот врв.
Разорна бура во Швајцарија: Загина 16-годишно девојче
Додека западна Европа се бори со жештините, Швајцарија ја погоди силно невреме проследено со обилни врнежи, силен ветер и илјадници молњи.
Најтрагичниот инцидент се случил во близина на Цирих, каде 16-годишно девојче починало откако врз неа паднало откорнато дрво. Уште седум лица биле повредени, а две завршиле во болница поради удари од скршени гранки. Во Цирих за краток период наврнале повеќе од 50 литри дожд на квадратен метар, што предизвикало поплави во подвозници и околу главната железничка станица. Според метеоролозите, низ цела Швајцарија биле регистрирани околу 21.000 молњи.
Пожари во Грција
Истовремено, Грција се соочува со пожари на повеќе локации, поттикнати од високите температури и сувото време. Противпожарните служби се во состојба на зголемена готовност поради ризикот од ширење на огнените стихии.
Невреме и предупредувања во регионот
Метеоролозите предупредуваат дека нестабилното време ќе продолжи и во делови од Балканот. Во Србија се очекуваат силни грмежливи процеси, локални поројни дождови, град и засилен ветер, а за Белград е издадено посебно предупредување за понеделник.
Експертите предупредуваат дека климатските промени придонесуваат за сè почести и поинтензивни екстремни временски појави, кои истовремено носат опасни жештини, силни бури и шумски пожари низ Европа.
