Некои европски региони во текот на годината примаат десетици, па и повеќе од сто туристички ноќевања на секој свој жител. Новите податоци на Евростат за 2024 година покажуваат огромни разлики во туристичкиот притисок низ Европската Унија. На врвот убедливо се наоѓа Јужниот Егеј во Грција, каде што бројот на туристички ноќевања е повеќе од 127 пати поголем од бројот на жители.
Показателот се пресметува според бројот на туристички ноќевања во однос на бројот на жители и покажува колку туризмот е концентриран во одредени подрачја.
Јужниот Егеј далеку пред сите
Во Јужниот Егеј, регион во кој се наоѓаат популарните дестинации како Санторини, Родос и Кос, во 2024 година биле регистрирани околу 41,5 милиони туристички ноќевања. Во регионот живеат само околу 326.000 луѓе, што значи дека се регистрирани 127,2 туристички ноќевања на секој жител. На второто место се Јонските Острови, каде што се наоѓаат Крф и Закинтос. Таму биле регистрирани 102,6 ноќевања по жител, односно околу 20,5 милиони ноќевања на приближно 200.000 жители.
Разликата со повеќето европски региони е огромна.
Хрватскиот Јадран меѓу туристичките рекордери
На третото место се наоѓа италијанската покраина Болцано, со 68,9 туристички ноќевања по жител. Веднаш зад неа е хрватскиот Јадран, со 67,5 ноќевања по жител. Станува збор за подрачје кое ги опфаќа дел од најпосетуваните хрватски туристички центри, меѓу кои се Дубровник и Сплит.
На петтото место се Балеарските Острови во Шпанија, со 60 ноќевања по жител. Таму спаѓаат познатите дестинации Мајорка и Ибица.
И Крит е меѓу најоптоварените
Грчкиот остров Крит е на шестото место, со 55,6 туристички ноќевања по жител. Но, овие бројки се исклучок на европско ниво. Во најголем дел од регионите на ЕУ бројот на туристички ноќевања е под 15 по жител. Дури и Северниот Егеј, уште еден грчки регион на листата, имал 14,9 ноќевања по жител, што било доволно за 24-то место.
Од повеќе од 100 до помалку од едно ноќевање
На спротивниот крај од листата е полскиот регион Мазовјецко, кој го опфаќа и подрачјето околу Варшава. Таму се регистрирани само 0,7 туристички ноќевања по жител. Уште понизок е показателот во Мајот, францускиот остров во Индискиот Океан, со само 0,5 ноќевања по жител.
Податоците покажуваат колку нерамномерно е распределен туризмот во Европа – од региони каде што туристичките ноќевања се повеќе од 100 пати поголеми од бројот на жители, до места каде што има помалку од едно ноќевање по жител. За најпопуларните туристички региони тоа истовремено значи и огромен економски потенцијал, но и сè поголем притисок врз инфраструктурата, домувањето, водата, отпадот и локалното население.
