Европската Унија разгледува можност за привремено замрзнување на ограничувањата на цената на руската сурова нафта поради растечката загриженост од последиците што конфликтот на Блискиот Исток би можел да ги има врз глобалното снабдување со енергенси. Според информациите на агенцијата Bloomberg, европските претставници дискутираат за неколку сценарија, меѓу кои е и задржување на сегашното ниво на ценовниот лимит за руската нафта, наместо негово дополнително намалување или корекција.

Извори запознаени со разговорите наведуваат дека една од опциите е да се суспендира автоматскиот механизам за промена на ценовниот лимит до крајот на годината. Во игра е и можноста ограничувањето да се фиксира на 60 долари за барел, што е нивото што првично го воспоставија земјите од Г7.

Ова доаѓа во период кога се очекуваше редовната ревизија на мерките во јули да доведе до зголемување на лимитот на 65 долари за барел, поради променетите услови на светскиот пазар. Покрај дискусиите за цената на нафтата, Европска Унија подготвува и нов, 21-ви пакет санкции против Русија. Според досегашните информации, новите мерки би можеле да опфатат банки, трговци со нафта, рафинерии и крипто-компании во трети земји кои наводно помагаат во заобиколување на санкциите.

Во пакетот се разгледуваат и ограничувања за околу 20 танкери кои, според европските власти, директно или индиректно се поврзани со рускиот извоз на нафта. Сегашниот механизам за ограничување на цената беше воведен во декември 2022 година од земјите на Г7, заедно со Австралија и Европската Унија. Со него беше забрането осигурување и транспорт на руска нафта што се продава над утврдената граница од 60 долари за барел.

Во септември 2025 година, ЕУ во координација со Обединето Кралство, Швајцарија, Канада и Нов Зеланд дополнително го намали ценовниот лимит на 47,6 долари за барел. Како одговор на западните санкции, Владимир Путин уште кон крајот на 2022 година потпиша указ со кој се забранува продажба на руска нафта на компании и држави што во своите договори ги признаваат западните ценовни ограничувања.

Русија неодамна ја продолжи важноста на оваа мерка до 30 јуни 2026 година.

Аналитичарите оценуваат дека евентуалното замрзнување на ограничувањата би покажало дека геополитичките ризици на Блискиот Исток стануваат сè поважен фактор во европската енергетска политика. Доколку дојде до дополнителни нарушувања во снабдувањето преку Ормутски Теснец, европските земји би можеле привремено да дадат приоритет на стабилноста на пазарот пред дополнително заострување на мерките кон Русија.