Европската Унија се соочува со сериозни несогласувања околу мигрантската криза во шпанската енклава Сеута, откако 22 земји-членки ја обвинија Шпанија дека не успеала навреме да го спречи масовниот влез на мигранти од Мароко.

Во заедничко отворено писмо, потпишано меѓу другите и од германскиот канцелар Фридрих Мерц и италијанската премиерка Џорџа Мелони, се наведува дека „не смее да се дозволи масовен и неконтролиран влез на мигранти, ниту нивна инструментализација како дел од хибридни закани“.

Поради кризата, министрите за внатрешни работи на ЕУ во вторник ќе одржат итен состанок во Брисел.

Шпанскиот премиер Педро Санчез ги отфрли критиките, нагласувајќи дека ситуацијата во Сеута била ставена под контрола за помалку од 48 часа. Тој истовремено им забележа на европските партнери дека не покажале доволно солидарност во заштитата на шпанскиот суверенитет.

Европските медиуми различно ја толкуваат кризата. Весникот „Ел Паис“ оценува дека случувањата во Сеута ја обединиле европската десница против сè поизолираниот Санчез, додека конзервативниот „Ел Мундо“ ја обвинува шпанската влада дека предоцна реагирала на предупредувањата за можниот масовен влез на мигранти.

Италијанскиот весник „Ла Република“ истакнува дека Сеута има стратешко значење за Европа, бидејќи контролира дел од пристапот кон Гибралтарскиот Теснец.

Во меѓувреме, британскиот Би-би-си наведува дека сè поголем број земји во ЕУ бараат построга миграциска политика, додека ставот на Шпанија останува дека поради стареењето на населението и недостигот од работна сила, на земјата ѝ се потребни странски работници.

Шпанија претходно легализираше престој на стотици илјади лица кои престојувале нелегално во земјата, потег што предизвика критики од повеќе европски влади.

Во заедничкото писмо, 22-те земји-членки порачуваат дека случувањата во Сеута бараат „усогласен и итен одговор на Европската Унија“.