Европската Унија и САД рано утринава постигнаа важен компромис за спроведување на трговскиот договор, со што е избегната заканата од нови високи царини што ги најавуваше американскиот претседател Доналд Трамп.

Според информации на POLITICO, договорот бил постигнат по повеќечасовни преговори меѓу Европскиот парламент, Советот на ЕУ и Европската комисија.

Компромисот доаѓа по неколкумесечни тензии и несогласувања околу царинската политика меѓу Брисел и Вашингтон. Трамп претходно се закани со воведување царини од 25 проценти за европските автомобили доколку ЕУ продолжи да го одложува договорот.

Што предвидува договорот?

Според договореното, Европската Унија ќе ги укине царините за дел од американските индустриски и земјоделски производи, додека САД ќе ги ограничат царините за најголемиот дел од европскиот извоз на 15 проценти. Во договорот е вклучена и таканаречена „sunset“ клаузула, според која договорот автоматски би престанал да важи во декември 2029 година, речиси една година по заминувањето на Трамп од Белата куќа.

Дополнително, Европската комисија ќе има можност да го суспендира договорот доколку Вашингтон до крајот на 2026 година не ги намали високите царини за европскиот челик и алуминиум, кои во моментов достигнуваат и до 50 проценти.

ЕУ сака стабилност, но останува недовербата

Еврокомесарот за трговија изјави дека ЕУ уште еднаш покажала дека е „сигурен и доверлив трговски партнер“.

Сепак, дел од европратениците и натаму се скептични кон договорот, особено поради претходните закани на Трамп кон европските сојузници, вклучително и контроверзните изјави за Гренланд.

Договорот сега оди на гласање во Европскиот парламент, кое се очекува во јуни во Стразбур.

Извор: Politico