Естонскиот премиер Кристен Михал нареди подготовка на мерки за можно целосно затворање на границата со Русија по обидот за напад врз компанија што произведува воени дронови. Естонските безбедносни служби се сомневаат дека зад обидот за саботажа стои руската воена разузнавачка служба ГРУ, објави естонскиот јавен медиум ЕРР.
Во саботата, 14 ноември, осуммина латвиски државјани беа приведени по обид за провала во производствениот погон на компанијата „Треод Системс“ во Виймси, северно од Талин. Според естонските власти, целта на нападот била да се предизвика експлозија и да се запали објектот во кој, меѓу другото, се произведуваат извидувачки и борбени дронови со голем дострел.
Премиерот нареди подготовка за затворање на границата
Михал денеска објави дека за можноста за затворање на источната граница разговарал со министерот за внатрешни работи Игор Таро. На министерството и на владините служби им наложил да ги подготват сите потребни мерки за границата да може да се затвори доколку безбедносната состојба дополнително се влоши.
Естонскиот премиер предупреди дека руските разузнавачки служби ги користат граничните премини за дејствување против Естонија. Според него, затворањето на границата би ги намалило безбедносните ризици и би испратило порака до Москва дека нападите врз естонската одбранбена индустрија се неприфатливи.
Втор напад врз одбранбената индустрија
Најновиот инцидент не е прв ваков случај во Естонија. Во август беше извршен подметнат напад врз компанијата „Милрем Роботикс“ во Талин, која развива беспилотни воени возила и други одбранбени технологии. Естонската Служба за внатрешна безбедност проценува дека обидот за напад врз „Треод Системс“ бил изведен по налог на руската воена разузнавачка служба ГРУ. Премиерот Михал порача дека целта на ваквите операции е заплашување на населението и слабеење на поддршката за Украина.
Естонија, нагласи тој, нема да ја намали помошта за Киев, туку ќе продолжи да ја зајакнува соработката со сојузниците и да го зголемува притисокот врз Русија.
Граничните премини со месеци работат со скратено работно време
Естонија во моментов има три отворени гранични премини со Русија: Нарва, Лухама и Коидаула. Сите работат од 7 до 19 часот, а ноќното затворање е воведено заради зајакнување на безбедноста на границата и поефикасен надзор.
Владата во август одлучи ограниченото работно време да важи до понатамошно известување. Тогаш министерот за внатрешни работи изјави дека нема доволно причини за целосно затворање на границата, но најновиот безбедносен инцидент повторно го отвори ова прашање. Естонските власти засега не објавија датум за можно затворање на границата, ниту потврдија дека е донесена конечна одлука.
