Пазарот на нови автомобили во Европската унија во првите шест месеци од 2026 година забележа раст на регистрациите од 5,7 отсто во однос на истиот период лани, покажува извештајот на европското здружение на производители автомобили ACEA. Уделот на целосно електричните автомобили достигна 20,7 отсто, наспроти 15,6 отсто минатата година, додека хибридните модели остануваат најбаран избор со 37,3 отсто од пазарот.

Спротивно на растот на електрификацијата, регистрациите на бензински автомобили паднаа за 17,2 отсто, со вкупно 1.309.153 нови возила во првите шест месеци. Дизел моделите го продолжија силазниот тренд со пад од 16,5 отсто, а нивниот пазарен удел се намали на 7,5 отсто, наспроти 9,4 отсто лани. Заедно, бензинот и дизелот денес го држат само 29,7 отсто од пазарот. Лани во истиот период тој удел изнесуваше 37,8 отсто.

Во ЕУ во првото полугодие се регистрирани вкупно 1.220.890 нови целосно електрични автомобили. Три од четирите најголеми пазари за овие возила, кои заедно сочинуваат 63 отсто од сите регистрации од овој тип, забележаа значителен раст. Франција предничи со 62,9 отсто, следена од Германија со 48 отсто и Данска со 41,2 отсто.

Регистрирани се 2.198.148 хибридно-електрични автомобили, поттикнати од раст во Италија од 23 отсто и во Шпанија од 20,8 отсто, а раст имаше и во Германија и Франција. Приклучните (plug-in) хибриди достигнаа 577.735 единици и пазарен удел од 9,8 отсто. Лани во истиот период тој удел изнесуваше 8,5 отсто.