Екстремните топлотни бранови што ја зафатија Европа ова лето би можеле да предизвикаат нов раст на цените на храната во следните години, предупредуваат економисти. Според нивните анализи, климатските услови сега претставуваат поголем ризик за инфлацијата на храната отколку неодамнешните геополитички тензии и нестабилноста на енергетските пазари.

Иако инфлацијата на храната во еврозоната во последните месеци забавува, експертите од „Oxford Economics“ и „Deutsche Bank“ сметаат дека сушите и високите температури ќе ги намалат приносите на земјоделските култури, што ќе доведе до поскапување на овошјето, зеленчукот, житарките и преработените прехранбени производи.

Повисоките трошоци за енергија и ѓубрива и понатаму имаат влијание врз производството, но аналитичарите оценуваат дека временските услови ќе имаат уште поголем ефект. Проценките покажуваат дека само климатските фактори би можеле да ја зголемат инфлацијата на храната во еврозоната за околу еден процентен поен во текот на 2027 година.

И покрај сегашното смирување на цените, економистите предупредуваат дека последиците од годинашните горештини ќе се почувствуваат со задоцнување, кога ќе се појават помали приноси и повисоки производствени трошоци. Дополнителен ризик претставуваат можните екстремни временски појави поврзани со климатскиот феномен Ел Нињо.

Истражувањата на Европската централна банка укажуваат дека климатските промени сè повеќе влијаат врз инфлацијата, а најсилен удар трпи токму секторот за храна. Според проценките, со понатамошното затоплување на климата, секој следен топлотен бран ќе има уште поголемо влијание врз земјоделското производство и врз цените што ги плаќаат потрошувачите.