Сè поголем е стравот од ескалација на епидемијата на ебола во Демократска Република Конго, откако разгневени демонстранти запалија центар за лекување, што дополнително ги отежнува напорите за спречување на ширењето на болеста.

Според најновите податоци на министерството за здравство на Конго, досега се регистрирани 670 сомнителни случаи и 160 сомнителни смртни случаи. Лабораториски се потврдени 61 заразен пациент.

Здравствените власти потврдија и два случаи во соседна Уганда, додека дополнителна загриженост предизвикува ширењето на заразата во делови од источен Конго кои се под контрола на бунтовнички групи. Светска здравствена организација предупреди дека епидемијата најверојатно е многу поголема отколку што покажуваат официјалните бројки и дека болеста се шири со загрижувачка брзина.

Нереди и запален медицински центар

Во градот Рвампара, едно од жариштата на епидемијата во провинцијата Итури, избувнале немири откако семејството на починат пациент одбило да ја прифати причината за смртта и побарало телото да им биде предадено. Според очевидци, демонстрантите запалиле шатори на хуманитарна медицинска организација пред болницата. Полицијата интервенирала со солзавец и предупредувачки истрели за да ја растера толпата.

Дополнителен проблем е тоа што за сојот Bundibugyo, кој ја предизвикува оваа епидемија, сè уште нема одобрена вакцина ниту лек. Експертите проценуваат дека за развој и поширока достапност на вакцина ќе бидат потребни најмалку шест до девет месеци.

Меѓународна помош и рестрикции

Обединето Кралство најави помош од 20 милиони фунти за справување со кризата, додека САД веќе издвоиле 23 милиони долари и планираат отворање до 50 клиники во Конго и Уганда. Во меѓувреме, Уганда привремено го суспендира јавниот патнички превоз од Конго, а американските власти воведоа засилени проверки за патници кои престојувале во Конго, Уганда или Јужен Судан.

Извор- Sky News / Reuters / WHO / Index.hr