Протекоа 15 милиони документи од „Дојче банк“: под лупа врските со Епстин, Трамп и руските олигарси

Повеќе од 15 милиони доверливи документи од „Дојче банк“ се основа на меѓународна новинарска истрага за деловните односи на банката со Џефри Епстин, Доналд Трамп и руски олигарси. Банката одговара дека извештаите се однесуваат на стари случаи и дека во меѓувреме ги зајакнала контролите.

Истрагата „Inside Deutsche Bank“ опфаќа околу девет милиони електронски пораки, интерни извештаи и други документи за работењето на германската банка од почетокот на минатата деценија.

Материјалите ги доставиле двајца укажувачи, а ги анализирале повеќе од 230 новинари од околу 50 медиумски организации. Проектот го координира јужноафриканската непрофитна организација „Баракуда медија“.

Еден од наодите се однесува на трансфери поврзани со осудениот сексуален престапник Џефри Епстин. Според истрагата на „Фајненшл тајмс“, банката обработила сомнителни плаќања во вкупна вредност од 582 милиони долари. Износот е наведен во пријави за сомнителни активности доставени до американските власти во 2019 година. Таквата пријава сама по себе не е доказ дека секоја опфатена трансакција била незаконска.

Документите отвораат прашања и за заштитата на податоците на клиентите. Во 2017 година даночен документ на Трамп по грешка бил испратен до сметководител на друг клиент. Истрагата ги разгледува и напорите на банката да го проширува бизнисот во Русија пред инвазијата врз Украина, и покрај внатрешни предупредувања за ризиците.


„Дојче банк“ тврди дека објавените случаи се стари со години, а некои и со две децении. Според банката, тие биле разгледувани со надлежните регулатори, а денешните механизми за контрола се значително подобрени. Банката не очекува значително финансиско влијание од објавите.

е-Трн да боцка во твојот инбокс