Контроверзниот план на Доналд Трамп за увоз на руски дизел во Соединетите Американски Држави пред среднорочните избори се чини дека пропаѓа. Два танкери што првично пловеле кон американскиот брег ненадејно го смениле курсот, пишува „Фајненшл тајмс“.
Промената на насоката доаѓа во период кога залихите на дизел во САД продолжуваат да се намалуваат. Најновите податоци покажуваат дека тие паднале под 100 милиони барели, за првпат по повеќе од две децении. Недостигот создава дополнителен притисок врз пазарот на гориво, кое е од клучно значење за функционирањето на американската економија.
Во неделите пред изборите, Трамп се договорил со рускиот претседател Владимир Путин за купување и увоз на дизел од Русија, со цел да се намалат цените на горивата и да се привлечат гласачи. Но, овој потег не им донесе политичка корист на републиканците. Демократските кандидати во вторникот остварија убедливи победи низ земјата и ја презедоа контролата врз двата дома на Конгресот.
Танкерите одеднаш ги сменија дестинациите
„Талисман“, 20-годишен руски танкер под санкции на САД, Велика Британија и Европската Унија, и „Леруо“, танкер во сопственост на компанија од Хонг Конг, кој плови под знамето на Сиера Леоне и е под санкции на Велика Британија, ЕУ и Канада, повеќе не го наведуваат американскиот атлантски брег како дестинација.
„Леруо“ во понеделникот го промени навигацискиот сигнал и како нова дестинација го означи Бразил. „Талисман“, пак, се оддалечи од Атлантскиот Океан и се врати кон Средоземното Море. Според податоците за навигација, моментално се наоѓа во близина на брегот на Алжир.
Бродот го емитува сигналот „чека наредби“, што значи дека за товарот сè уште нема потврден купувач или пристаниште за истовар.
Трет танкер натоварен со руски дизел, грчкиот „Агиои Фанедес“, според навигациските податоци и натаму плови кон САД, но и тој известува дека „чека наредби“. Неговиот сопственик, компанијата „Истерн Медитеран Маритим“, претходно за „Фајненшл тајмс“ изјавил дека бродот плови и чека инструкции бидејќи пристаништето за истовар сè уште не е потврдено. Компанијата не одговорила на дополнителното барање за коментар во средата.
Од друга страна, танкерот „Ѕверот“ од Сејшелите, кој е под санкции и го натоварил својот товар на 27 октомври во руското пристаниште Приморск, исто така се движи кон САД. На неговиот навигациски систем е означена дестинацијата „Атлантик“, што укажува дека се упатува кон американскиот атлантски брег.
Гувернерката им се закани на пристаништата што ќе примат руски бродови
Сопствениците на санкционираните танкери не биле достапни за коментар. Договорот на Трамп со Путин предизвикал незадоволство кај демократите, но и кај дел од републиканските претставници во Конгресот. Тие предупредиле дека договорот може да биде незаконски и побарале негово итно раскинување.
Гувернерката на Њу Џерси, Мики Шерил, оваа недела испратила официјално писмо до операторите на пристаништата и терминалите во нејзината држава, преку кои пристигнуваат пратките наменети за пристаништето во Њујорк. Таа ги предупредила дека мора да го вратат секој танкер што превезува руски дизел, во спротивно ќе се соочат со строги казни.
„Две од трите пратки руски дизел наменети за САД сега се пренасочени кон други дестинации“, изјавил Мет Смит, аналитичар во компанијата „Кплер“.
„Третиот танкер, „Агиои Фанедес“, треба да пристигне во Њујорк овој викенд. Сепак, со оглед на тоа што американските купувачи очигледно се двоумат поради регулативите, законите и санкциите, не би било изненадување ако и овој танкер го промени курсот и ги заобиколи САД“, додал тој.
Џејкоб Мелдгард, извршен директор на компанијата за транспорт на нафтени деривати ТОРМ, оценил дека малкуте пратки што досега биле натоварени и промената на нивните дестинации покажуваат колку е тешко Русија повторно да се вклучи во пошироките трговски текови.
„Дури и пред демократите да ја преземат контролата врз Конгресот, беше јасно дека враќањето на Русија во глобалната економија не оди толку лесно. Дури и кога самата американска администрација се обидува да го поттикне тоа“, рекол Мелдгард.
Залихите се намалуваат, цените на дизелот растат
Глобалните залихи на дизел значително се намалиле поради падот на капацитетите за рафинирање, предизвикан од војните во Иран и Украина.
Цените на фјучерсите на дизелот скокнале за повеќе од 60 отсто откако Трамп ја започнал војната со Иран, додека цената на американските бензински пумпи се движи околу 6,27 долари за галон, блиску до рекордно високото ниво достигнато во септември.
