Десетици илјади Чеси денеска протестираа во Прага против владиниот план за укинување на радиодифузната такса и финансирање на јавните медиуми од државниот буџет. Критичарите предупредуваат дека ваквата политика би можела да ја поткопа независноста и финансиската одржливост на јавните медиуми.

Опозициските партии ги споредија предлозите од нацрт-законот, претставен во октомври, со промените во Унгарија за време на поранешниот премиер Виктор Орбан, под чија власт беше создадена мрежа провладини медиуми.

Голем метеж во Прага

Локалните власти проценуваа дека на протестот би можеле да се соберат стотици илјади луѓе. Демонстрациите се одржуваат во пресрет на празникот на 17 ноември, кога се одбележува Кадифената револуција од 1989 година – настанот што ја собори комунистичката власт и го доведе дисидентот и драматург Вацлав Хавел на чело на државата.

Просторот пред бината во паркот Летна, со поглед кон чешката престолнина, брзо се исполни, а голем метеж се создаде и на блиските метро-станици. Многумина носеа капи изработени од весници, во чест на анимираниот лик кој со децении ги најавува приказните за деца пред спиење на Чешката телевизија.

Популистичката влада на премиерот и милијардер Андреј Бабиш, со поддршка од крајнодесничарската партија СПД и евроскептичната партија „Автомобилисти“, ги обвинува приватните и јавните медиуми за пристрасност.

Укинување на месечната радиодифузна такса

Владејачката коалиција го поддржува предлог-законот со кој би се укинала месечната такса за јавните медиуми, која изнесува 205 круни (8,39 евра) и во моментов се користи за нивно финансирање. Предлогот го помина првото читање и чека натамошна расправа. Вработените во Чешката телевизија и Чешкото радио ја интензивираа борбата со еднодневен штрајк на почетокот на ноември, поради кој програмата беше ограничена. Протестите ги поддржаа и уметници и студенти.

Критичарите предупредуваат дека префрлањето на финансирањето во државниот буџет би ја нарушило врската меѓу медиумите и гледачите што ја плаќаат таксата, а јавниот медиумски сектор би го направило поранлив на политички притисоци.

Предложеното намалување на финансирањето за 15 проценти би го свело номиналниот буџет на телевизијата на нивото од 2008 година, а буџетот на радиото на нивото од 2005 година. Од медиумите велат дека таквото намалување е неодржливо. Бабиш, пак, тврди дека владата само го исполнува ветувањето за намалување на финансискиот товар врз граѓаните.