Артилерискиот баталјон на Армијата вечерва истрела десет почесни плотуни во Скопје по повод Денот на независноста. Почесната стрелба се изврши во 19 часот од шест артилериски орудија во кругот на касарната „Илинден“. Станува збор за редовна протоколарна активност во пресрет на државниот празник, а не за вонреден безбедносен настан.

Подготовките за одбележувањето предвидуваа и претходна проверка на орудијата. Во 18 часот единицата изврши пробна артилериска стрелба со еден плотун од сите шест орудија.

Поради силата на звукот од истовременото истрелување, детонациите се слушаа во повеќе скопски населби. Токму затоа надлежните укажуваат дека истрелите во двата одделни термина се исклучиво дел од воениот протокол за одбележување на празникот.

Стрелбата традиционално се организира секоја година во пресрет на 8 Септември. Државата утре одбележува 35 години од референдумот одржан во 1991 година, кога мнозинството граѓани гласаа за самостојна и суверена Македонија.