Силен земјотрес со магнитуда 7.5 ја погоди североисточната обала на Јапонија, со епицентар во морето кај регионот Санрику, на длабочина од околу 10 километри, соопшти Јапонска метеоролошка агенција. Веднаш по потресот беше издадено предупредување за цунами за делови од североисточниот дел на земјата, а до граѓаните беше испратена јасна порака: „Веднаш евакуирајте се“. Првите бранови веќе стигнаа до брегот, при што највисокиот досега измерен достигна околу 80 сантиметри, но властите предупредуваат дека следните бранови може да бидат значително повисоки – и до три метри.
Премиерката Санае Такаичи потврди дека има човечки жртви и материјална штета, додавајќи дека во тек е собирање подетални информации за координација на одговорот на катастрофата. Формиран е кризен штаб, а спасувачките служби се мобилизирани.
Особено погодена е префектурата Ивате, каде на жителите од 11 градови им е препорачана евакуација. Предупредувања се издадени и за делови од Хокаидо и Аомори. Властите апелираат населението да се оддалечи од брегот и реките и да се засолни на повисоки места.
Според експертот за океанографија Сајмон Боксал од Универзитетот Саутемптон, следниот час ќе биде клучен за проценка на штетите, бидејќи главните бранови се очекува да пристигнат брзо по првичниот удар.
Јапонските власти предупредуваат и на можни последователни земјотреси во наредните денови, како и на ризик од свлечишта. Дополнително, постои опасност од нови, посилни бранови на цунами, што ја прави ситуацијата особено непредвидлива.
Јапонија користи тристепен систем за предупредување од цунами – од препорака, преку предупредување, до највисоко ниво кое бара итна евакуација. Во овој случај, издадено е предупредување што подразбира сериозна опасност и потреба од итно напуштање на загрозените подрачја.
Ситуацијата останува динамична, а властите апелираат на максимална претпазливост додека трае ризикот од нови потреси и цунами бранови.
