Црногорските власти не им дозволија влез во земјата на 87 српски државјани кои со чартер лет од Белград пристигнале во Тиват непосредно пред почетокот на самитот ЕУ–Западен Балкан, по што биле вратени назад во Србија. Според црногорскиот весник „Вијести“, авионот на „Ер Србија“ бил задржан на пистата на аеродромот во Тиват неколку часа, додека полицијата спроведувала детални безбедносни проверки на патниците.
Медиумот објави дека најголем дел од патниците биле млади мажи кои не дале јасно објаснување за причината за нивното доаѓање во Црна Гора. Повикани на полициски разговори, тие биле предмет на дополнителни проверки поради безбедносните мерки воведени за време на регионалниот самит. Во официјалното соопштение, црногорската полиција потврди дека чартер-летот бил издвоен за контрола во рамките на засилените активности поврзани со обезбедувањето на самитот.
„На аеродромот во Тиват се спроведуваат зголемени контроли, при што беше издвоен и ставен под контрола чартер лет на релацијата Белград–Тиват. Целта беше да се утврдат причините за престојот на лицата кои пристигнаа во Црна Гора“, соопшти полицијата.
Според „Вијести“, повикувајќи се на полициски извори, дел од патниците наводно имале криминални досиеја, а постоеле сомневања дека биле ангажирани за неформално обезбедување на српскиот претседател Александар Вучиќ за време на самитот. Овие информации засега не се официјално потврдени од надлежните институции. Српските власти досега не излегоа со официјален став за случајот.
Во меѓувреме, претставници на српската опозиција го искористија инцидентот за критики кон власта, обвинувајќи го Вучиќ дека во Црна Гора испратил лица блиски до криминални структури за дополнително обезбедување. И овие обвинувања засега остануваат без официјална потврда. Инцидентот се случува во време на засилени безбедносни мерки во Црна Гора поради одржувањето на самитот ЕУ–Западен Балкан, на кој присуствуваат високи европски и регионални претставници.
