Проектот за „Цветан Димов“ мора да биде усогласен со планираната втора линија на брзиот автобуски превоз, порача иницијативата НаТочак. Оттаму прашуваат дали Општина Чаир и Град Скопје ќе ги координираат проектантите или улицата, по реконструкцијата, повторно ќе треба да се прекопува за БРТ.

Според објавата на иницијативата, со одлука на Советот на Општина Чаир ѝ е предадена надлежноста за проектирање на улицата, која е во изворна надлежност на Град Скопје. НаТочак посочува дека по оваа траса е предвидено да минува втората линија на БРТ.

Иницијативата бара во проектната задача да бидат вклучени геометриските и функционалните барања за идниот автобуски систем. Истовремено, прашува дали тие барања се утврдени, наведувајќи дека сè уште нема проект и конечни одлуки за првата линија.

„Цветан Димов“: прво да се ослободат зафатените ленти

Во претходна објава за истата улица, НаТочак го оспори пристапот според кој сообраќајниот проблем треба да се решава првенствено со проширување на коловозот.

Според иницијативата, десните ленти во двете насоки се зафатени со паркирани возила, поради што во практика функционира само по една лента.

„Дали треба да исечеме повеќедецениски дрвја, да вложиме милиони, да се копа со години, за да добиеме на хартија три ленти во насока, а во практика две проодни ленти за возила?“, прашуваат од НаТочак.

Нивниот предлог е најпрво да се отстранат паркираните возила и да се овозможи користење на постојниот коловоз. Предупредуваат и на тротоари зафатени со автомобили и трговски содржини, кои го отежнуваат движењето на пешаците и велосипедистите.

Според нив, проширување на коловозот со стеснување на тротоарите, без решавање на заземањето на јавниот простор, може дополнително да ја влоши состојбата.

Бараат зачувување на дрвјата и јавно достапен проект

НаТочак бара постојните повеќедецениски дрвја да се вклопат во идното решение и таквата можност јавно да се презентира. Иницијативата ги издвојува сенката и амбиентот што ги создава дрворедот како особено вредни обележја на улицата.

Во најновата објава прашуваат и дали зеленилото што би се засадило по реконструкцијата подоцна повторно би било отстранувано поради изградбата на БРТ.

Меѓу барањата е објавување на вистинскиот проект, со димензии, образложение и можност за учество на граѓанската и експертската јавност. Според НаТочак, визуелните прикази не се доволни за да се процени колку простор навистина добиваат тротоарите, велосипедските патеки и зеленилото.

Иницијативата бара приоритет да имаат пешаците, велосипедистите, јавниот превоз и дрворедот. За жителите и корисниците на „Цветан Димов“, прашањето е дали реконструкцијата ќе обезбеди проодна и пристапна улица, усогласена и со идниот јавен превоз.