Општина Центар во буџетот за 2026 година обезбеди околу 4 милиони денари за еднократна финансиска поддршка за семејствата со новороденчиња, мерка што треба да им помогне на родителите во првите месеци по раѓањето на детето. 

Според информациите од општината, поддршката годинава е зголемена од 7.000 на 10.000 денари по новороденче, откако Советот на Општина Центар ја прифатил иницијативата за повисока финансиска помош. 

Од јануари досега, по овој основ веќе биле исплатени 696.681 денар на семејства што ги исполнуваат условите за добивање на средствата. Право на помошта имаат жители на Општина Центар кои ќе поднесат соодветна документација, меѓу која извод од матична книга на родени, лични документи и трансакциска сметка. 

Градоначалникот Горан Герасимовски по повод Меѓународниот ден на семејството истакнал дека општината продолжува со мерки насочени кон поддршка на семејствата, децата и повозрасните граѓани. Во фокусот, како што посочуваат од локалната самоуправа, е олеснување на секојдневниот живот на младите родители и подобрување на социјалната сигурност. 

Покрај директната финансиска помош, Општина Центар најавува и изградба на нова градинка во близина на Клиничкиот центар, инвестиција што треба да помогне во справување со недостигот на капацитети за згрижување деца во централното градско подрачје. 

Од општината посочуваат дека ваквите мерки имаат не само социјален, туку и долгорочен демографски и развоен ефект, особено во услови на високи трошоци за живот и зголемени потреби на младите семејства.