Цената на златото денеска остана стабилна, но близу најниското ниво во последниот месец и половина, под притисок од силниот американски долар и високите приноси на државните обврзници во САД. Според Reuters, spot gold се движи околу 4.481 долар за унца, додека американските фјучерси за јуни паднале за 0,6 проценти, на околу 4.483 долари.

Иако златото вообичаено се смета за „безбедно засолниште“ во периоди на геополитичка неизвесност, моментално пазарот го притискаат фактори што работат против него. Силниот долар го прави златото поскапо за купувачите што користат други валути, додека високите приноси на американските обврзници ја зголемуваат привлечноста на активи што носат камата. Златото, за разлика од обврзниците, не носи каматен принос, па во вакви услови дел од инвеститорите се повлекуваат.

На пазарите дополнително влијаат и очекувањата околу идната политика на Федералните резерви. Reuters објави дека повеќето економисти во нивната анкета сега не очекуваат намалување на каматните стапки пред 2027 година, додека инвеститорите ги следат записниците од последниот состанок на ФЕД за да добијат појасна слика за насоката на монетарната политика.

Цената на златото претходно падна за повеќе од еден процент, откако инфлациските стравувања и високите приноси повторно го засилија притисокот врз благородните метали. На 19 мај, spot gold падна за 1,4 проценти, на околу 4.504 долари за унца, што беше најниско ниво од 30 март.

Дел од останатите благородни метали денеска бележат раст. Среброто поскапе за 1,6 проценти, платината за 0,7 проценти, а паладиумот за 1,8 проценти, покажуваат податоците што ги пренесува Reuters.