Британскиот премиер Енди Бeрнам вети континуирана поддршка за Украина и покрај „скандалозните закани“ со кои се соочува неговата земја од Русија, пред состанокот на европските сојузници на Киев на кој ќе се разговара за нивната воена поддршка.
Состанокот на земјите-членки на „Коалицијата на волјата“, кој се одржува на 35-годишнината од независноста на Украина, заеднички го водат Обединетото Кралство, Франција и Германија.
Енди Бернам, на своето прво меѓународно патување, пристигна во Киев во понеделник наутро, заедно со претседателот на Европскиот совет, Антонио Коста, и неколку други лидери. Се очекува и други, вклучувајќи го и францускиот претседател Емануел Макрон, да учествуваат од далечина во дискусиите, кои се одвиваат во услови на ескалација на војната четири и пол години откако започна во 2022 година.
Toj, зборувајќи заедно со украинскиот претседател Володимир Зеленски, вети дека ќе продолжи да ја поддржува Украина и покрај „скандалозните закани“ упатени од Русија до Велика Британија.
Украина „не е товар за нашата безбедност, туку фронтовска линија што ја штити Европа“, рече тој, споредувајќи ја борбата со онаа против нацистичка Германија. Се очекува тој да објави дека одбранбената компанија MBDA е овластена да објави класифицирани информации потребни за да им помогне на Украина и Франција да воспостават локално производство на француско-британската крстосувачка ракета со долг дострел „Скалп“.
Веста веќе предизвика негодување од Кремљ, кој го обвини Лондон за нарушување на мирот и предупреди дека неговата војска ќе лоцира ракетни локации, а потоа ќе ги уништи. Украина се стреми да набави повеќе системи за оружје за да напаѓа длабоко во Русија, каде што ги таргетира логистиката и нафтената инфраструктура.
Магацини кои припаѓаат на онлајн пазар беа погодени преку ноќ во јужна Русија, а во урнатините во близина на еден од нив загинаа најмалку две деца, а седум други беа повредени, според локалните власти. Во последните недели, руските сили испукаа роеви балистички ракети кон Киев, при што загинаа десетици.
Руски воздушен напад врз станбена зграда во Чернигов, северна Украина, повреди околу петнаесет лица во понеделник, според локалните власти. Во саботата, Владимир Путин го призна интензивирањето на нападите во Украина. Киев „ја отвори Пандорината кутија“ со напаѓање на руската економија, а Москва има намера да возврати со тоа што, меѓу другото, ќе го таргетира и украинскиот земјоделски извоз, рече тој.
