Британскиот премиер: Брегзит сериозно го наруши меѓународниот углед на земјата

Енди Бернам најави нови разговори со Европската Унија за долгорочните односи и порача дека Британците ќе имаат последен збор за иднината на односите со Европа.

Меѓународниот углед на Велика Британија опаднал во деценијата по Брегзит, изјави британскиот премиер Енди Бернам, повторно навестувајќи дека Лабуристичката партија би можела да се откаже од досега поставените „црвени линии“ во односите со Европа во својата следна изборна програма, пишува „Гардијан“.

Во говор посветен на надворешната политика, Бернам најави дека по самитот во Брисел оваа недела ќе започне нови разговори со Европската Унија за можностите за „долгорочни односи“. Сепак, предупреди дека процесот ќе трае. Дел од министрите во неговата влада стравуваат дека повторното отворање на поделбите околу Брегзит е погрешен потег, но премиерот порача: „Во секоја фаза, британскиот народ ќе го има главниот збор“.

Внатрешни притисоци и можни идни опции

Се очекува Бернам да ги претстави главните можности за поблиски врски со ЕУ, меѓу кои се царинска унија, единствен пазар или целосно враќање на Велика Британија во членството. Тој ќе нагласи дека Лабуристичката партија нема да ги премине своите „црвени линии“ до следните парламентарни избори.

Дел од владините функционери сметаат дека процесот на поништување на последиците од Брегзит треба да се одвива побавно и дека не треба да се брза со одлуките. Извори од Даунинг стрит наведуваат дека Бернам сака да „постави рамка за дебата“, а не веднаш да наметне конечен исход. Сепак, признаваат дека можеби ја искомплицирал ситуацијата со тоа што јавно ја изнел својата лична наклонетост кон враќање во Унијата.

Застапниците на Брегзит во изминатите денови покренаа две одделни кампањи со цел Велика Британија да остане надвор од ЕУ доколку Бернам се обиде да го поништи излегувањето. Поранешните премиери Борис Џонсон и Дејвид Камерон, кои на референдумот беа на спротивставени страни, исто така предупредија дека тоа би било лош потег.

Критика на досегашната надворешна политика

Бернам во петок треба да се сретне со европските лидери на самитот во Брисел, со цел да обезбеди договори за кои тврди дека би можеле да го зголемат бруто-домашниот производ за 0,4 проценти, односно за околу 17 милијарди фунти. Меѓу нив се договори за храна и земјоделство, тргување со емисии и програма за мобилност на младите.

Во говорот на банкетот на лорд-градоначалникот во лондонското Сити, тој повтори дека постојниот договор меѓу Обединетото Кралство и ЕУ не е доволно добар. Го спореди со приказната „Царевата нова облека“, во која никој не се осмелува да ја каже вистината. „По самитот ќе започнеме разговори со нашите партнери од ЕУ за можностите за нашите долгорочни односи. Свесни сме дека и Велика Британија и ЕУ денес се значително поинакви отколку што беа порано“, рече Бернам.

„Тоа ќе потрае. Ќе ги претставиме можностите и нашата процена за да ги подготвиме одлуките за следниот парламентарен состав. Во секоја фаза, британскиот народ ќе го има главниот збор“, додаде тој.

Меѓународниот углед на Велика Британија

Во говорот премиерот ги обвини претходните влади дека ги занемарувале сојузниците, вклучително и оние надвор од Европа, со што бил нарушен меѓународниот углед на земјата. „Во деценијата по Брегзит, нашиот углед во светот се намали. Не им посветувавме доволно внимание на сојузниците и институциите, а последиците се почувствуваа и надвор од Европа“, изјави тој.

Додаде дека Обединетото Кралство не вложувало во модернизацијата на Комонвелтот, а во односите со Кина било „неодлучно“.

Тој го критикуваше и пристапот кон Израел пред да стане премиер.

„На Блискиот Исток, иако Велика Британија со право го осуди Хамас и ужасните напади од 7 октомври, нашиот одговор на она што следуваше во Газа наведе многумина да го преиспитаат нашиот морален компас“, рече Бернам.

„Создадовме впечаток дека Велика Британија, онаква каква што светот мислеше дека ја познава, се променила. Но не е така. Луѓето во оваа земја и понатаму се исто толку прекрасни и пристојни како и секогаш, но политичките превирања во нашето време создадоа впечаток на промена и предизвикаа збунетост“, додаде тој.

ЕУ: Велика Британија не може да учествува во носењето одлуки

Во меѓувреме, влијателен европски политичар порача дека Обединетото Кралство нема да „седи на масата“ додека се подготвуваат новите европски правила за храна и пијалаци. Сè додека не се приклучи на единствениот пазар, ќе мора да ги прифаќа правилата што ги носат другите.

Велика Британија бара одредена улога во „обликувањето“ на европските закони во рамките на договорот за земјоделско-прехранбени производи, кој треба да биде потпишан на самитот во петок. Сепак, Сандро Гоци, претседател на парламентарната делегација ЕУ–Обединето Кралство, изјави дека во сегашниот договорен модел Британија не може да учествува во донесувањето одлуки.

„Обединетото Кралство одлучи да замине. Брегзит беше одлука за повлекување од процесот на донесување одлуки. Не може да се случи Обединетото Кралство да седи на масата додека се подготвуваат и разгледуваат стандардите, бидејќи тоа е право резервирано за земјите членки“, објасни Гоци.

Тој додаде дека Велика Британија би можела да добие „советодавна улога“, по примерот на Швајцарија.

„Енди Бернам е во право што се обидува максимално да го искористи потенцијалот на сегашната ситуација. Но постојат граници, а ова е голема пречка“, рече тој.


Европскиот пратеник заклучи дека договорот за храна и пијалаци „порано или подоцна“ ќе ѝ покаже на Британија дека „статус кво состојбата има јасни граници и ограничувања, кои можат да се надминат само ако се откаже од црвените линии“.

е-Трн да боцка во твојот инбокс