Ненадејната смрт на актерката Хејден Панетиер во 36. година од животот отвори низа правни прашања околу нејзиното наследство. Таа зад себе ја остави 11-годишната ќерка Каја, која живее во Европа со таткото Владимир Кличко. Бидејќи јавноста сè уште нема информации за постоење тестамент или траст-фонд, правни експерти за магазинот „Пипл“ појаснуваат како калифорниските закони ќе одлучат кој ќе управува со богатството на Хејден Панетиер.
Ако Панетиер навреме основала траст-фонд, парите одат директно на сметката на тој фонд, а управувањето го презема лицето назначено во документите. Правникот Џонатан Форстер истакнува дека ваквиот механизам овозможува заштита на капиталот сè додека ќерката не стекне целосна финансиска зрелост.
Доколку таков документ не постои, целата постапка преминува под калифорниските прописи за наследување. Во тој случај, малолетната ќерка законски добива сè, но процесот станува целосно јавен преку оставинскиот суд. Правникот Марк Стерн потсетува дека јавната постапка ги открива сите имоти, сметки и евентуални долгови, што семејствата најчесто се обидуваат да го избегнат.
Како малолетно лице, Каја не може директно да располага со парите. Доколку нема траст-фонд, судот во Калифорнија мора да именува посебен старател на имотот, кој не мора автоматски да биде нејзиниот татко Владимир Кличко.
Калифорниското законодавство строго го раздвојува личното старателство над детето од управувањето со финансиите. Иако Кличко веќе има целосно старателство врз девојчето, за имотот би можеле правно да се заинтересираат и родителите на глумицата. Дополнителен предизвик претставува фактот што девојчето живее во Европа, додека надлежниот суд останува во Калифорнија, каде што се наоѓаат сметките и недвижностите.
Оставината не опфаќа само моменталните заштеди во банките и недвижниот имот. Адвокатот Џордан Метјуз наведува дека имотот вклучува постојани авторски хонорари од филмските и телевизиските улоги, како и приходи од нејзините мемоари.
Старателот на имотот ќе има обврска редовно да ги прибира сите тантиеми од емитувањето на нејзините проекти и секоја година да доставува детални финансиски извештаи до надлежниот суд. Ако судот одреди службено старателство, Каја ќе добие целосен пристап до сите средства веднаш по полнолетството, односно на 18 години.
