По јавните критики за трошењето на државните пари, студентскиот стандард и непочитувањето на законите, граѓанскиот активист Бленди Ходаи вели дека деновиве добива бројни предупредувања да внимава на својата безбедност. Порачува дека заканите нема да го замолчат, туку ќе го направат уште погласен.

„Чувај се!“ – ова е пораката што граѓанскиот активист Бленди Ходаи вели дека најчесто ја добива во последните неколку дена, во период на засилени јавни критики кон институциите, нивното трошење на јавните пари и односот кон студентите.

Во објава на социјалните мрежи, Ходаи наведува дека предупредувањата пристигнуваат од пријатели, колеги, познаници, но и од луѓе што никогаш лично не ги сретнал.

„И знаете што е најстрашно? Што во оваа држава треба да се чуваш затоа што јавно зборуваш за корупција, злоупотреба на јавни пари и непочитување на законите“, напиша Ходаи.

Неговата порака доаѓа по неколкудневната јавна полемика за студентскиот стандард, субвенционираниот студентски оброк и привилегиите на функционерите, во која Ходаи упати остри критики кон Владата и премиерот Христијан Мицкоски.

Од битката за студентскиот оброк до јавна полемика со премиерот

Ходаи, кој е претставник на Форумот за образовни промени, во изминатиот период го актуализираше прашањето за неусогласувањето на субвенционираниот студентски оброк со инфлацијата.

Форумот поднесе тужба до Управниот суд поради, како што тврди, непочитување на законската обврска за усогласување на износот од 140 денари дневно со растот на животните трошоци. Министерството за образование и наука ги отфрла тврдењата дека го прекршило законот.

Неговите критики добија пошироко внимание откако ги спореди цените на храната во собраниското бифе со средствата што им се на располагање на студентите.

Во јавната полемика се вклучи и премиерот Мицкоски, кој ги оцени дел од критиките како навредливи за професорите. Ходаи, пак, возврати дека барањата за подобар студентски стандард не претставуваат навреда, туку барање институциите да ги почитуваат своите обврски.

Во интервју за „Слободен печат“, објавено на 12 ноември, Ходаи дополнително ги критикуваше институционалните привилегии и начинот на кој се трошат јавните средства.

„Заканите само ме прават погласен и поупорен“

По реакциите во јавноста, Ходаи сега открива дека добива бројни пораки во кои луѓето го предупредуваат да биде внимателен.

Тој им се заблагодарува на сите што изразиле грижа за неговата безбедност, но нагласува дека нема намера да отстапи од своите ставови.

„Но, тие што ме познаваат знаат дека заканите кај мене не поминуваат. Напротив, само ме прават погласен и поупорен“, порача Ходаи.

Во објавата не прецизира кој му се заканувал, каква била содржината на евентуалните директни закани, ниту дали случајот е пријавен во полиција.

Сепак, неговото сведоштво отвора пошироко прашање за атмосферата во која дејствуваат граѓанските активисти и за можноста јавно да се критикуваат носителите на власта без страв од последици.

Јавната критика на институциите, укажувањето на можни злоупотреби на јавни средства и барањето одговорност се легитимни форми на граѓанско учество. Заканите, доколку постојат, бараат институционална реакција независно од тоа кому се упатени и какви политички ставови застапува лицето.

Пораката на Ходаи, наместо повлекување, е дека ќе продолжи јавно да зборува за прашањата што ги отвора.