На адресата „Савил роу“ 3 во Лондон, каде „Битлси“ го одржаа својот последен јавен настап, во 2027 година се очекува да биде отворен музеј посветен на легендарниот бенд.

Легендарната британска група „Битлси“ ќе добие свој музеј во Лондон, кој се очекува да биде отворен во 2027 година на познатата адреса „Савил роу“ 3. Токму на покривот од оваа зграда, на 30 јануари 1969 година, бендот го одржа својот последен јавен настап.

Објектот бил седиште на групата од 1968 до 1972 година, а во неговиот подрум бил снимен и албумот „Let It Be“. Новиот музеј треба да им понуди на посетителите уникатно искуство преку архивски материјали, интерактивни изложби и реконструкција на оригиналното студио.

Пол Макартни изјави дека сака обожавателите конечно да добијат официјално место во Лондон посветено на „Битлси“. Тој посочи дека туристите можат да ја посетат улицата „Еби роуд“, но дека таму нема вистински музејски простор поврзан со бендот.

Компанијата „Епл корпус“ планира повторно да го оживее и познатиот концерт на покривот, со обновување на оригиналната ограда од 1969 година. Последниот настап на групата беше прикажан и во документарецот „The Beatles: Get Back“ на режисерот Питер Џексон.

„Навистина беше посебно чувство повторно да се вратам на ‘Савил роу’ 3. Во тие ѕидови има многу спомени“, изјави Макартни.

Ринго Стар, пак, кратко порача: „Вау, како повторно да се враќам дома“.

Музејот се очекува да стане нова важна точка за љубителите на музичката историја во Лондон, но и место каде приказната за „Битлси“ ќе се раскажува од просторот во кој дел од неа навистина се случила.