Повеќето луѓе сè уште не сфаќаат колку брзо напредува вештачката интелигенција, смета Бил Гејтс. Во интервју за „Си-Би-Ес морнингс“, коосновачот на „Мајкрософт“ оцени дека општеството има „слепа точка“ кога станува збор за потенцијалот и ризиците од новата технологија. Коментарот доаѓа во време на зголемена дебата во технолошкиот сектор за тоа дали развојот на најмоќните модели на вештачка интелигенција се одвива пребрзо и дали регулацијата може да го следи темпото.

Гејтс: ВИ може да се злоупотреби

Гејтс го коментирал и ставот на американскиот претседател Доналд Трамп дека опасностите поврзани со вештачката интелигенција се преувеличени. Според Гејтс, Трамп во овој поглед е во слична позиција како и голем дел од јавноста – прашувајќи се дали ВИ е само уште една технологија, слична на оние што претходно го промениле општеството.

Гејтс, сепак, смета дека потенцијалот на ВИ е многу поширок.

Тој предупреди дека технологијата може да се користи за корисни цели, но и да биде злоупотребена за биотероризам, финансиски напади и други деструктивни активности. Истовремено, тој оцени дека американскиот претседател би можел да има значајна улога доколку успее да создаде поширок политички и општествен консензус околу тоа како треба да се управува со развојот на ВИ.

„Ова е речиси еволутивен настан“

„Повеќето луѓе сè уште не сфаќаат колку брзо се движи ова“, рече Гејтс.

Според него, споредбите со претходните технолошки револуции не се целосно соодветни бидејќи вештачката интелигенција може да достигне способности кои ги надминуваат одредени човечки когнитивни способности.

„Вештачката интелигенција е речиси еволутивен настан“, оцени тој.

Гејтс и претходно предупредуваше дека темпото на развој на ВИ може да биде многу побрзо од темпото со кое општествата можат да се приспособат. Во еден неодамнешен текст тој напиша дека ВИ може значително да го промени глобалниот пазар на труд во рок од една деценија, наместо промените да се одвиваат постепено низ неколку генерации. Според неговото сценарио, вештачката интелигенција би можела брзо да навлезе во професии и сектори како правото, корисничката поддршка, медицината, развојот на софтвер и производството.

Нови работни места ќе се појавуваат, но Гејтс предупредува дека без соодветни јавни политики тие можеби нема да бидат доволни за да го надоместат бројот и видот на работните места што ќе исчезнат.

Гејтс сака ВИ да стане достапна и надвор од богатите земји

Покрај ризиците, Гејтс нагласува дека вештачката интелигенција може да има огромна корист, особено во земјите каде што недостигаат лекари, наставници и други стручни кадри. Фондацијата „Гејтс“ планира да вложи една милијарда долари во следните две години за проширување на пристапот до ВИ во образованието, здравството и земјоделството. Еден од приоритетите е технологијата да биде достапна и на јазици кои не се англиски.

Фондацијата во понеделникот соопшти дека иницијативата за подобрување на повеќејазичниот пристап кон ВИ обединува околу 60 учесници. Меѓу партнерите се „Антропик“, „Гугл“, „Мајкрософт“ и „ОпенАИ фондацијата“.

Гејтс даде пример со здравството во Африка, каде што во многу региони има голем недостиг од лекари. Според него, пациент во иднина би можел на својот мајчин јазик да ги опише симптомите преку апликација со ВИ и да добие основна здравствена поддршка. Проблемот е што квалитетот на ВИ системите за голем дел од светските јазици сè уште е значително послаб од оној за англискиот. Токму затоа, според Гејтс, прашањето повеќе не е само колку брзо се развива ВИ, туку и кој ќе има пристап до нејзините придобивки.