Министерството за внатрешни работи ја пушти во употреба мобилната апликација „Безбеден град“, преку која возачите со странски регистрациски таблички можат електронски да ги проверат и да ги платат сообраќајните казни регистрирани во земјава. Новиот дигитален сервис е дел од проектот за автоматизирана контрола на сообраќајот и овозможува брзо подмирување на сите глоби за сторени сообраќајни прекршоци.
Мобилната апликација „Безбеден град“ во оваа првична фаза е наменета за возила регистрирани надвор од земјава. Преку системот, странските државјани и македонските граѓани кои управуваат возила со странски таблички можат со внесување на бројот на регистрацијата и пасошот да добијат увид во евидентираните сообраќајни прекршоци.
Сообраќајните казни се плаќаат онлајн, директно преку апликацијата со помош на банкарска платежна картичка. Системот веднаш ја евидентира уплатата и ја генерира потврдата за подмирен долг кон МВР, со што се избегнуваат дополнителни административни процедури и чекање на шалтери.
Иако апликацијата во моментов покрива само странски регистарски таблички, од МВР најавуваат дека во следната фаза платформата ќе биде достапна и за сите возила со македонски регистрациски ознаки. Ова е дел од поширокиот процес на дигитализација на полициските услуги и целосната имплементација на паметниот систем за контрола на сообраќајот низ градовите.
