Високите температури не го оптоваруваат само срцето и крвните садови, туку го активираат и хормонскиот систем, додека дехидрацијата е една од главните причини за замор, поспаност и главоболка.

Топлотниот бран претставува голем стрес за организмот, кој активира низа механизми за да ја одржи телесната температура, количината на вода и рамнотежата на електролитите. Токму поради тоа, во текот на жешките денови може да се појават замор, раздразливост, поспаност и намалена концентрација.

Според ендокринологот Весна Димитријевиќ-Среќковиќ, важна улога имаат хормоните адреналин и норадреналин, кои го забрзуваат срцевиот ритам и го зголемуваат крвниот притисок, но истовремено помагаат во ослободувањето на топлината преку кожата.

Се активира и кортизолот, хормонот на стресот, кој може да помогне во обезбедувањето енергија и одржувањето на крвниот притисок при дехидрација. Вазопресинот и алдостеронот, пак, му помагаат на организмот да задржи вода и натриум и да ја одржи рамнотежата на течностите.

Сепак, најчеста причина за тегобите во текот на топлотниот бран е дехидрацијата предизвикана од високите температури и прекумерното потење. Посебно внимателни треба да бидат луѓето со дијабетес и нарушувања на работата на тироидната жлезда, како и оние кои работат или спортуваат на отворено.

Експертите советуваат редовно внесување течности, полесна исхрана и намирници богати со вода, како зеленчук, овошје, јогурт и кефир. Треба да се избегнуваат тешки, масни и многу зачинети оброци, особено во најтоплиот дел од денот.

Многу забрзан пулс, силна главоболка, вртоглавица, изразен замор и поспаност може да бидат предупредувачки знаци на сериозен топлотен стрес. Во таков случај потребно е веднаш да се побара лекарска помош.