Австралија најверојатно се соочува со „најголемо ширење на дифтерија“ во последните неколку децении, предупреди министерот за здравство Марк Батлер, додека се истражува и можен смртен случај поврзан со оваа болест.

Тој во интервју за ABC Radio National изјави дека речиси сите случаи на оваа потенцијално смртоносна инфекција се регистрирани кај домородното население на Австралија. Епидемијата е концентрирана во Северната Територија, но властите предупредуваат дека веќе има знаци на нејзино ширење и во други делови од земјата.

Што е дифтерија?

Дифтеријата е заразна бактериска болест која најчесто ги зафаќа грлото и носот, а понекогаш и кожата. Болеста денес е ретка во развиените земји благодарение на редовната вакцинација која се спроведува уште од 1940-тите години.И покрај тоа, ризикот од зараза постои при патувања во региони каде што вакцинираноста е пониска.

Најдобра заштита е целосна вакцинација и редовни ревакцинации, бидејќи имунитетот со текот на времето може да ослабне.

Симптоми на дифтерија

Можни симптоми на болеста се: сгуст сиво-бел слој кој може да го покрие грлото, јазикот и носот, висока температура, болки во грлото, отечени жлезди на вратот и отежнато дишење и голтање. Кај кожната форма на болеста може да се појават гнојни меурчиња и болни рани со црвенило.

Состојбата во Австралија

Министерот Батлер истакна дека владата веќе ги засилува кампањите за вакцинација и испораката на вакцини во погодените подрачја. Иако се истражува пријавен смртен случај, локалните власти сè уште не го потврдиле директниот поврзувачки фактор, но нагласуваат дека ситуацијата е сериозна.

Според Националниот систем за надзор на заразни болести, оваа година се регистрирани неколку стотици случаи – од кои 133 во Северната Територија и 82 во Западна Австралија. Граѓаните се советуваат да размислат за ревакцинација, особено ако патуваат во области со зголемен ризик.

Историски контекст

По воведувањето на школска вакцинација во 1932 година, бројот на случаи во Австралија значително опаднал. Тогаш биле пријавени повеќе од 14.000 случаи. Денес, повеќе од 90% од децата се вакцинирани против дифтерија, а во 2023 година опфатот кај петгодишни деца достигнал 94%.

И покрај високиот степен на вакцинација, актуелното избувнување предизвикува загриженост кај здравствените власти, особено во контекст на глобалниот пораст на заразни болести како ебола и други вирусни епидемии во светот.