Холандската авиокомпанија KLM Royal Dutch Airlines и ZeroAvia, која произведува авионски мотори со нулта емисија на штетни гасови, вчера склучија партнерство и најавија летови на течен водород.
Првиот демонстративен лет во реални услови е планиран за 2026 година, а авионот ќе биде опремен со моторот ZeroAvia ZA2000 со нулта емисија, кој се придвижува од течен водород како гориво. Водородните мотори користат водород во горивни ќелии за да генерираат електрична енергија, која потоа се користи за напојување на електрични мотори кои ги вртат пропелерите на авионот. Единствената емисија што се создава е водена пареа со ниска температура, а релевантните студии проценуваат дека овој вид на водороден погон има 90 проценти помало влијание врз климата во споредба со летовите кои користат керозин.
Исто така, до најавениот лет, компаниите ќе вложат дополнителни напори да изберат оптимални аеродроми за тестирање, да добијат дозволи од регулаторните органи, да обезбедат доволно количества течен водород и да ја развијат придружната водородна инфраструктура.
Партнерството има за цел да ја забрза еколошката транзиција на KLM и да обезбеди поодржливи напредни воздухопловни технологии во мрежата на летови на авиокомпанијата, како и да ја поттикне европската воздухопловна индустрија да користи течни водородни и водородни мотори.
„Комерцијалната авијација се повеќе се свртува кон водородно-електрични мотори како потенцијално решение за почиста воздухопловна иднина. Задоволни сме што соработуваме со авиокомпанијата KLM, која има толку богата историја“, изјави Сергеј Киселев, главен бизнис директор на ZeroAvia.
„KLM си постави задача да биде лидер на патот кон поодржлива иднина на воздухопловството и затоа активно поддржуваме и поттикнуваме различни иновации и технологии во индустријата. Заедно со нашите партнери, спроведуваме истражување за летови со електрична енергија, водород и хибриден погон и истражуваме начини да го забрзаме овој напредок“, рече Мартен Копманс, извршен директор на KLM Citihopper.
KLM и ZeroAvia ќе тестираат модифициран авион ATR 72 или Dash 8 400 опремен со мотори ZA2000 за првиот лет.
Фото: pexels
Извор: Top One
