Кинескиот државен надзорен систем покрена постапка за укинување на социјалната помош на семејство од провинцијата Ѓангси, откако нивната ќерка заминала на концерт во Хонгконг. Младата девојка, идентификувана со презимето Хуанг, со месеци работела физички работи за да го плати билетот и патувањето. Случајот предизвика остри реакции во јавноста откако автоматскиот алгоритам за следење на корисниците на помош го регистрирал нејзиното патување како недозволен луксуз за сиромашно домаќинство.
Патувањето од Ѓангси до Хонгконг веднаш го активираше системот за динамичко следење на корисниците на минимална социјална помош. Локалната канцеларија за социјални прашања во градот Ганџоу потврди дека алгоритмот автоматски испратил предупредување до социјалните служби.
Пред заминувањето, социјален работник ја предупредил девојката дека секое патување во Хонгконг може да предизвика итна ревизија на помошта. Семејството живее во тешка материјална состојба. За нив, можниот прекин на исплатите претставува егзистенцијален удар.
Властите засега немаат донесено конечна одлука. Во тек е увид во семејните приходи, имотот и банкарските трансакции.
Кинеската влада во 2021 година прогласи победа над екстремната сиромаштија. Сепак, податоците покажуваат дека речиси 40 милиони луѓе сè уште живеат од минимална државна помош. Најголем дел од нив живеат во руралните средини.
Во зоната Ганџоу, највисокиот месечен износ на социјална помош за градско домаќинство изнесува околу 123 евра по лице. Овие средства се наменети исклучиво за преживување. Затоа, секоја потрошувачка надвор од основните потреби станува мета на институционален сомнеж.
Случајот ги подели граѓаните на социјалните мрежи. Едни сметаат дека секој човек има право да ги потроши чесно заработените пари на музика или патување без страв од државна казна. Други тврдат дека заработката морала да оди за покривање на семејните долгови и трошоци, наместо за забава.
Во дебатата се вклучи и партискиот весник „Пиплс дејли“. Во коментарот се наведува дека граѓаните треба да имаат разумна слобода, но се нагласува дека социјалната помош подлежи на строги правила. Официјален Пекинг смета дека трошоците за патување надвор од континентална Кина оправдано покренуваат сомнеж за реалниот социјален статус на семејството.
