Apple се подготвува за најголемата промена во понудата на Mac компјутери во последните години. Според информациите од индустриски извори, компанијата во периодот од оваа есен до крајот на 2027 година ќе претстави нови верзии на речиси сите свои компјутери – од десктоп моделите iMac и Mac Studio до популарните MacBook лаптопи.
Први на ред се новиот 14-инчен MacBook Pro од пониска класа и освежениот iMac. Овие модели се веќе завршени и се очекува нивната испорака да започне наесен. Новиот MacBook Pro ќе биде еден од првите уреди со новата генерација процесор M6, додека iMac ќе добие прво освежување по повеќе од две години.
Нов MacBook Pro со OLED екран и екран на допир
Најголемата промена се очекува кај поскапите 14 и 16-инчни MacBook Pro модели. Apple наводно работи на целосно нов дизајн со OLED дисплеј и екран чувствителен на допир, што би било историска промена за компанијата. Досега Apple долго време се спротивставуваше на идејата Mac компјутерите да имаат тачскрин, сметајќи дека iPad е уредот наменет за такво искуство.
Новите модели би требало да пристигнат меѓу крајот на 2026 и почетокот на 2027 година, со процесори M5 Pro и M5 Max, додека следната генерација M7 Pro и M7 Max се очекува дури кон крајот на 2027 или почетокот на 2028 година.
MacBook Air останува со познат дизајн
Apple подготвува и нови верзии на MacBook Air со екрани од 13 и 15 инчи. За разлика од Pro моделите, Air серијата најверојатно ќе го задржи актуелниот дизајн кој последен пат беше променет во 2022 година.
OLED верзија на MacBook Air не се очекува пред 2028 година. Компанијата работи и на нов базичен 14-инчен MacBook Pro, кој визуелно ќе биде поблизок до премиум моделите, но ќе користи стандардниот чип M7.
Ќе добие ли и MacBook Neo нова верзија?
Apple неодамна го претстави поевтиниот MacBook Neo, но веќе тестира негова обновена верзија.
Новиот модел би можел да добие: посилен процесор A19 Pro, повеќе меморија, нови бои, периодични освежувања за да остане конкурентен во понискиот ценовен сегмент.
Иако Apple има амбициозни планови, најголемиот проблем може да биде нешто што ја погодува целата технолошка индустрија, недостигот на меморија. Mac mini и Mac Studio веќе се тестираат со нови процесори, но нивното пуштање на пазарот ќе зависи од состојбата со мемориските чипови.
Причината е експлозивниот раст на побарувачката за AI технологија. Големите компании кои развиваат вештачка интелигенција купуваат огромни количини меморија за дата-центрите, а производителите на чипови им даваат приоритет на купувачите кои плаќаат повеќе.
Поради тоа, некои актуелни конфигурации на Mac компјутери веќе имаат рокови на испорака од неколку месеци.
Apple влегува во нова AI ера
Новата генерација Mac компјутери треба да биде подготвена за ерата на вештачката интелигенција – со посилни процесори, поголема меморија и подобри перформанси за локално извршување AI апликации.
Но, останува отворено прашањето дали Apple ќе има доволно чипови за да ја задоволи побарувачката.
По години на постепени подобрувања, Apple подготвува голема трансформација на Mac линијата. Сепак, во ерата на AI, најголемиот предизвик можеби нема да биде технологијата ,туку доволно брзото производство на компонентите.
