Анте Поповски остана запаметен како еден од големите македонски поети, но неговото творештво не завршува на страниците од книгите. По повод 95 години од неговото раѓање, Кинотеката на Северна Македонија ќе отвори уште една врата кон неговиот опус, онаа филмската.
Од 3 до 6 јуни, во соработка со Здружението за зачувување на делото на Анте Поповски „Антево перо“, во Кинотеката ќе се одржи филмски омаж на академик Анте Поповски. Програмата ќе прикаже повеќе филмови во кои Поповски се јавува како сценарист или продуцент, со што публиката ќе има можност да се запознае со еден делумно запоставен аспект од неговата творечка личност.
Куратор на програмата е филмологот и советник во Кинотеката, вонр. проф. д-р Атанас Чупоски, кој на отворањето ќе има воведен збор. Извадоци од есеистичкото творештво на Анте Поповски ќе интерпретира актерката Софија Гогова Врчаковска.
Омажот почнува со „Дае“ и „Планината на гневот“
Програмата започнува во среда, на 3 јуни, токму на роденденот на поетот. Во 19 часот ќе бидат прикажани документарниот филм „Дае“ од 1979 година, во режија на Столе Попов, првиот македонски кандидат за „Оскар“, како и играниот филм „Планината на гневот“ од 1968 година, во режија на Љубиша Георгиевски. Двата филма се работени по сценарија на Анте Поповски.
Во четврток, на 4 јуни, исто така во 19 часот, публиката ќе може да ги погледне кусометражните документарни филмови „Кој век минува надвор деца“ од 1975 година на Љубиша Георгиевски, „Џафра“ од 1978 година на Кирил Ценевски и „Врати на бескрајот“ од 1982 година на Владимир Блажевски. И овие филмови се создадени по сценарија на Поповски.
Поповски како продуцент во „Вардар филм“
Во петок, на 5 јуни, во 20:30 часот, во летното кино на Кинотеката, на отворено ќе бидат прикажани долгометражните играни филмови „Време, води“ од 1980 година на Бранко Гапо и „Црвениот коњ“ од 1981 година на Столе Попов. Во овие филмови Анте Поповски се јавува како продуцент, односно како тогашен директор на продуцентската куќа „Вардар филм“.
Филмскиот омаж завршува во сабота, на 6 јуни, во 19 часот, со проекции на портретите на венцоносците на поетскиот фестивал „Струшки вечери на поезијата“: „Рафаел Алберти“ и „Ежен Гилвик“, двата од 1979 година, како и документарниот филм „Мостови – Струшки вечери на поезијата“ од 1982 година. Трите филма се во режија на Кирил Ценевски, а по сценарија на Анте Поповски.
Овој омаж не е само потсетување на годишнина, туку и обид да се прочита Анте Поповски надвор од вообичаената рамка. Не само како поет, академик и есеист, туку и како автор кој оставил трага во македонската кинематографија, во времето кога филмот, литературата и културната меморија често зборувале на ист јазик.
