Полската писателка за деца Ана Пашкевич неделава ќе престојува во Скопје, каде што ќе одржи креативни работилници инспирирани од нејзината сликовница „Три желби“. Станува збор за современа еколошка и едукативна приказна што ја преобмислува познатата бајка за златната рипка, но овојпат од перспектива на природата и живиот свет.
Работилниците ќе се одржат на 12 и 13 мај под наслов „Совршениот дом за златната рипка“, со деца од рана училишна возраст. Преку различни материјали, игра и креативни методи, Пашкевич ќе ги запознае децата со растителниот и животинскиот свет во водните средини и ќе поттикне разговор за односот кон природата и најблиската околина.
Во „Три желби“, златната рипка повеќе не е магично суштество што ги исполнува желбите на луѓето. Наместо тоа, таа посакува луѓето да направат нешто добро за планетата. Книгата отвора теми за загадувањето, емпатијата, одговорноста и малите чекори што можат да донесат промена. Илустрациите се на Јоана Бартошик, а преводот на македонски е на проф. д-р Лидија Танушевска.
Ана Пашкевич е една од позначајните современи полски авторки за деца, позната по тоа што преку едноставен јазик обработува теми како природа, емоции, идентитет, осаменост, инклузија и различни начини на доживување на светот. Авторка е на повеќе од шеесет книги за деца, а нејзините дела се преведени на повеќе јазици.
Работилниците во Скопје се организираат со поддршка на Општина Центар, во соработка со основните училишта „Коле Неделковски“, „Јохан Хајнрих Песталоци“, „Гоце Делчев“ и „Димитар Миладинов“, како и со Градската библиотека „Браќа Миладиновци“. Пашкевич ќе има средба и со студентите од Катедрата по славистика на Филолошкиот факултет „Блаже Конески“.
