Кинеската технолошка компанија Алибаба доби одобрение од берзата во Хонгконг да го продолжи процесот за самостојно котирање на својот оддел за полупроводници Т-Хед (T-Head). Со овој потег, кинескиот гигант бара свеж капитал на пазарот за да го забрза развојот на сопствени чипови за вештачка интелигенција, во период кога Пекинг прави стратешки напори да ја намали зависноста од американските технолошки производители.

Одлуката на берзата во Хонгконг му овозможува на одделот основан во 2018 година самостојно да издава и продава акции на јавноста и на големите институционални инвеститори. Т-Хед уште на 11 септември поднесе доверливо барање за иницијална јавна понуда, но официјалниот датум на тргување и точниот износ што планираат да го соберат сè уште не се објавени.

Постапката за берзанско котирање бара уште неколку регулаторни чекори, меѓу кои и согласност од кинескиот регулатор за пазари на капитал. Од Алибаба соопштија дека и по завршувањето на продажбата на дел од акциите, компанијата ќе ја задржи контролата врз Т-Хед. Сепарацијата има цел да им овозможи на инвеститорите посебно да ја вреднуваат полупроводничката гранка, додека самите акции на Алибаба во Хонгконг бележат пад од околу 29 проценти од почетокот на годината.

Т-Хед развива специјализирани чипови наменети за дата-центри и пресметковни системи кои тренираат модели на вештачка интелигенција. Кон крајот на септември компанијата го претстави новиот процесор Џенву В900 (Zhenwu V900), за кој тврди дека поседува трипати поголема пресметковна моќ од претходникот Џенву М890, пуштен во мај.

Овие процесори се клучен инфраструктурен елемент во натпреварот со американските производители како Нвидија. Поради трговските и безбедносните ограничувања што САД ги воведоа за извоз на напредни чипови, кинеските технолошки компании масовно вложуваат во сопствен хардвер. Покрај Алибаба, слични чекори подготвуваат и други кинески играчи како Баиду со својата дивизија Кунлуншин, што покажува дека пазарот на процесори во Азија влегува во фаза на забрзана прераспределба.