Виртуелни инфлуенсери создадени со помош на вештачка интелигенција стануваат сè попопуларни на YouTube и социјалните мрежи, прикажувајќи ја историјата на сосема нов начин. Наместо класични лекции и учебници, гледачите денес можат да „патуваат“ во минатото преку видеа во кои AI ликови шетаат низ антички Рим, Англија од времето на Хенри VIII или дури и низ луксузните ходници на Титаник.

Еден од најпознатите вакви канали е „Chloe VS History“, кој има милиони прегледи и стотици илјади следбеници. Во видеата, виртуелната Chloe разговара со камерата како вистински влогер, посетува пазари од минатото, пробува традиционална храна и истражува историски настани од прво лице. Авторот на проектот, Џонатан Ларами, вели дека целта е помладите генерации да ја доживеат историјата на поинтересен и повизуелен начин.

Тој објаснува дека историјата предолго се учела само од книги, што не им одговара на сите ученици. Благодарение на новите AI алатки, денес е можно минатото да се прикаже многу пореалистично и подинамично. За создавање на видеата се користат историски извори, научни текстови и илустрации за содржината да биде што поверодостојна.

Сепак, технологијата не е совршена. Авторот признава дека понекогаш AI системите додаваат модерни детали во историските сцени, како рачни часовници или очила за сонце во антички Рим. И покрај тоа, интересот на публиката постојано расте, а некои видеа достигнуваат и повеќемилионска гледаност.

Историчарите сметаат дека ваквиот формат има голем потенцијал за образованието и популаризацијата на историјата. Според нив, AI видеата можат да им помогнат на луѓето полесно да се поврзат со минатото и да ги доживеат историските настани на поемоционален начин. Тие веруваат дека ваквата технологија нема да ги замени музеите и академските истражувања, туку ќе биде дополнителен начин историјата да стане поблиска и поинтересна за новите генерации.