Повеќе од 15.000 посетители поминаа низ паркот „Авионче“ во првите три вечери од второто издание на AERO Street Food Festival, соопштија организаторите. Настанот што започна на 4 септември во општина Аеродром влегува во својата завршница денес и утре, кога публиката ќе ги следи настапите на South Park, Acoustic Division и Sure Shotz. Влезот за сите содржини останува бесплатен за посетителите.

Фестивалот стартуваше на 4 септември со диџеј сетовите на Milan Serafimov и Aleksandar Jordanov, како и концертот на The Ringtones. Во саботата, паркот забележа најголема посетеност кога пред 20-те штандови на домашни и регионални гастрономски брендови се формираа постојани редици.

Неделната програма понуди поинаков звук. Бендот Dopamine и диџеј Rizinski го пополнија отворениот простор со ретро селекција, задржувајќи ја публиката до полноќ.

Програмата денес, на 7 септември, започнува со сетовите на диџеите од колективот Fluere, по што на главната сцена се качува бендот South Park.

Завршната вечер на 8 септември стартува со DJ Ficho и DJ Guardian. Веднаш по нив настапува Acoustic Division со специјален репертоар, додека честа да го затворат годинешното издание ја има составот Sure Shotz.

Фестивалскиот простор во паркот „Авионче“ ги отвора портите секој ден од 17:30 часот, овозможувајќи им на посетителите пристап до гастрономската понуда пред почетокот на настапите. Музичкиот дел официјално стартува во 19:30 часот.

Организаторите потсетуваат дека пристапот до сите настани во паркот е слободен за граѓаните.