Републиканците во Претставничкиот дом на американскиот Конгрес ја запреа иницијативата за отповикување на министерот за одбрана Пит Хегсет, откако на гласањето во раните вечерни часови не се појавија 11 демократски пратеници. Дел од пратениците го пропуштија терминот поради сообраќајна несреќа и застој на авенијата Пенсилванија, додека нивните сопартијци отворено го критикуваа ваквиот пропуст.

Гласањето за иницијативата за отповикување на Пит Хегсет заврши околу 18 часот по источноамериканско време. Во моментот на затворање на гласањето, во салата недостигаа 11 демократски конгресмени, што им овозможи на републиканците да го блокираат предлогот.

Од кабинетот на пратеничката Мелани Стенсбери од Ново Мексико соопштија дека таа не успеала навреме да стигне до Капитол поради сообраќајна несреќа на авенијата Пенсилванија и полициска придружба на автобус. Кога Стенсбери влегла во салата на Претставничкиот дом, гласањето веќе било заклучено.

Слична ситуација пријави и кабинетот на пратеничката Мерилин Стрикленд од сојузната држава Вашингтон. Нејзиниот шеф на кабинет изјави дека Стрикленд била заглавена зад колона возила и дека гласањето завршило една минута пред нејзиното пристигнување во салата.

Дел од демократските пратеници кои присуствуваа на седницата јавно го искажаа своето незадоволство од отсуството на нивните колеги. Пратеничката Александрија Окасио-Кортез од Њујорк порача дека избраните функционери имаат обврска да ја извршуваат работата за која граѓаните им ја дале довербата.

„Граѓаните нè испратија овде за да работиме. Не знам дали некој имал вистински здравствени проблеми или нешто слично, па сакам да оставам простор за таква можност. Сепак, овде сме за да работиме. Исто како што морав да доаѓам на работа додека работев во ресторан, така и овде мораме да дојдеме и да си ја завршиме работата“, изјави Окасио-Кортез за Си-Ен-Ен (CNN).