Албанскиот премиер Еди Рама најави серија ригорозни казнени мерки против учесниците во масовните протести во Тирана. Наместо дијалог со незадоволните граѓани, владата воведува директен финансиски притисок: семејствата на приведените малолетници ќе мора од свој џеб да ја надоместат материјалната штета, наставниците кои ги поддржуваат учениците ќе бидат избркани од образовниот систем, а за студентите се укинуваат стипендиите и бесплатното студирање. Истовремено, полициските службеници добиваат специјални парични бонуси.
Премиерот Еди Рама преку видео-обраќање ја информираше јавноста за новите одлуки на извршната власт со кои фокусот се префрла врз финансиско казнување на семејствата. Според неговата наредба, родителите на малолетните лица што се приведени или идентификувани за време на судирите на улиците ќе сносат целосна материјална одговорност за секој скршен семафор, запален контејнер или оштетена јавна зграда.
Државните служби веќе прават проценка на теренот, а сметките за санирање на штетите ќе им бидат испорачани директно на домашна адреса. Овој потег наиде на силен отпор кај граѓанските здруженија и правните експерти, кои предупредуваат дека колективното казнување на семејствата претставува преседан без законско упориште и обид за задушување на младинскиот бунт преку социјален страв.
Притисокот директно се прелева и во образовните институции. Рама упати јавна закана до наставниците и професорите во средните училишта, предупредувајќи ги дека секој просветен работник кој ги поттикнува или толерира учениците да излезат на протест веднаш ќе го загуби своето работно место.
„Тие луѓе повеќе нема да бидат дел од државниот систем“, порача албанскиот премиер.
За студентите од државните универзитети кои ќе бидат евидентирани од полицијата мерките се подеднакво остри. Секој студент против кого полицијата ќе поднесе пријава автоматски го губи правото на државна стипендија и ќе мора да плаќа целосна школарина до крајот на студиите. Оваа мерка директно ги таргетира младите луѓе со пониски примања за кои стипендијата е единствен начин да останат на факултет.
Додека за младите и просветните работници следуваат санкции, владата обезбеди буџетски средства за наградување на полицијата. Рама соопшти дека сите полицајци ангажирани во разбивањето на протестите и заштитата на институциите ќе добијат вонредни парични бонуси на нивните плати.
Ваквата отворена диференцијација, во која државните пари се користат за да се награди полициската сила додека се казнуваат граѓаните, предизвика дополнителна поларизација. Во обид да ја делигитимира масовноста на улиците, Рама во своето обраќање тврдеше дека зад протестите стојат странски влијанија од Русија и Иран, како и инфилтрирани екстремистички групи. Опозицијата и младинските организации ги отфрлија овие обвинувања како класичен обид на власта да го дефокусира вниманието од реалниот социјален револт и корупцијата.
