Во текот на ноќта кон утре и во претпладневните часови во среда нè очекува краткотрајно стабилизирање на времето, со престанок на врнежите и делумно разведрување над поголем дел од Македонија.
Утрото во среда ќе биде релативно студено, со минимални температури кои ќе се спуштаат од -4 до 3 степени, додека преку денот максималните температури ќе се искачат во интервал од 4 до 11 степени.
Во Скопје и околината, дневната температура ќе достигне околу 7 степени.
Нови врнежи веќе од попладне
Сепак, стабилното време ќе биде само кратка пауза. Под влијание на циклонски систем со центар над Џенова, веќе во попладневните и вечерните часови во среда од запад повторно ќе се прошират врнежи кон Македонија.
На пониските места врнежите ќе бидат од дожд, додека на планините над 1200–1300 метри надморска височина се очекуваат врнежи од снег. Истовремено повторно ќе започне да дува јужен и југоисточен ветер, кој повремено ќе засилува на интензитет.
Дожд и во Скопје
Во текот на попладнето и вечерта во среда, повремен локален дожд ќе има и во Скопје и околината, што ќе означи нова промена на временските услови.
Граѓаните се советуваат да ја искористат кратката стабилизација, бидејќи веќе од втората половина на денот следува нова влажна епизода.
