Утре, 25 мај, се навршуваат 82 години од Десантот на Дрвар,една од најпознатите и најдраматични воени операции на просторот на поранешна Југославија за време на Втората светска војна. Целта на нацистичка Германија била јасна да го зароби или убие Јосип Броз Тито и да го уништи Врховниот штаб на партизанското движење.

И покрај големите сили и деталното планирање, операцијата завршила со неуспех и останала запаметена како симбол на отпорот и важна пресвртница во понатамошниот тек на војната на Балканот.

Операцијата „Коњички скок“ – обид за елиминација на Тито

На 25 мај 1944 година, на роденденот на Тито, германските сили ја започнале операцијата со кодно име „Коњички скок“ (германски: Rösselsprung), со директно одобрение од Адолф Хитлер. Целта не била само заземање на Дрвар, туку ликвидација или заробување на Тито и уништување на раководството на Народноослободителната војска на Југославија.

Нападот започнал во раните утрински часови со силно бомбардирање на Дрвар и околината, по што германски падобранци од 500. СС падобрански баталјон извршиле воздушен десант. Истовремено, копнените сили напредувале кон Дрвар од повеќе правци од Книн, Бихаќ, Бања Лука, Јајце и Ливно.

16.000 војници против партизаните

Според историските податоци, во операцијата учествувале околу 16.000 германски војници, со поддршка од авијацијата, како и сили на тогашната Независна Држава Хрватска и четнички формации. Во самиот Дрвар се воделе исклучително жестоки борби, особено околу пештерата каде што се наоѓал Врховниот штаб.

Иако германските единици успеале да заземат делови од градот, главната цел на операцијата не била остварена. Тито и членовите на Врховниот штаб успеале да се извлечат од обрачот, додека партизанските единици дале силен отпор и им нанеле значителни загуби на германските сили.

Особено се истакнала Шестата личка пролетерска дивизија, чии борци со забрзан марш пристигнале во Дрвар и се вклучиле во борбите.

Голем удар за нацистичките планови

Историчарите наведуваат дека неуспехот на оваа операција претставувал сериозен удар за германските планови на Балканот. Во исто време, партизанското движење остварило значајна политичка и пропагандна победа, дополнително зацврстувајќи ја својата позиција меѓу сојузниците.

Десантот на Дрвар остана запаметен како една од најдраматичните воени операции во Втората светска војна на просторот на поранешна Југославија, а настаните од мај 1944 година и денес претставуваат важен дел од историското паметење во регионот.